(NLTimes)—Un atardi di lesamento pa mucha cu drag queens (hende homber cu ‘alter ego’ di hende muhe) na LantarenVenster theater na Rotterdam a wordo posponi den secreto pa un par ora diadomingo. Organisadonan a bisa cu nan a dicidi pa haci esaki pa asina preveni exposicion di mayornan y mucha pa protestadonan cu ta contra e evento aki.

E atardi di lesamento mester a tuma luga 2or di atardi, pero a move esaki pa 10:30 di mainta. Pa ora cu varios shen activista, incluyendo oponentenan a reuni pafo di e teatro, e evento a pasa caba.

E dos drag queens cu a lesa a sali for di e teatro cu man wanta, pa cual despues nan a haya webo tira den nan direccion. Activistanan cu ta simpatisa cu e evento a brinda un bon bini na e dos drag queens cu aplauso.

Pa preveni confrontacion, e polis a posiciona nan mes entre e apoyadonan y oponentenan pa e evento di lesamento. Fuera di algun strobacion chikito, a keda keto na e teatro. Por ehempel, polis a para un grupo di proponentenan di e evento cu kier a cana bay cerca e oponentenan di e organisacion derechista Voorpost. Un vocero pa polis a bisa cu nan no a detene ningun hende. “Nos a puntra hende pa bay, parcialmente pasobra nan no kier a sigui instruccion di polis.”

E teatro a ricibi hopi yama tocante e atardi di lesamento, segun nan a reporta. Entre otro, e Pink Lion Foundation y e partido di Jongerenorganisatie Forum voor Democratie (JFVD) a anuncia cu nan ta bay ta presente.

E Pink Lion Foundation a bisa cu nan no ta contra drag queens, pero nan tin miedo cu e evento aki lo sigui reenforsa e disgusto pa drag queens y pues tambe pa hendenan homosexual, pasobra mucha ta envolvi. Esaki por resulta cu drag queens nan por haya nan mes den peliger.

E evento tabata e enfoke di un debate siman pasa, den cual a acusa cu atardinan di lesamento cu drag queens lo sexualisa muchanan. Pero e drag queen Ma’MaQueen, ken ta co-organisa e evento aki pa basta aña caba, a nenga e acusacionnan aki.

“Mi curason ta kibra,” segun el a conta Nu.nl. Ma’MaQueen tabata un participante den e prome temporada di RuPaul’s Drag Race Holland na 2020. “Mi ta keda cu mi cabes ariba, pero e ta afecta mi si. E pasion cu mi tin pa loke mi ta haci a bira un topico pa bringa over dje, y esey ta sinti diferente,” el a conta un dia prome cu e evento na Rotterdam.

Diadomingo, proponente- y oponentenan di e evento a keda na e teatro ta para te un par ora despues cu e evento a caba, aunke e cantidad di persona presente a cuminsa baha gradualmente.