Desde fayecimento di e hoben Bruce Arends den luna di juli 2014, su mama Vianca Arends no a para keto pa saca afo e berdad ya cu segun su persona, e hoben su caso no a haya un trato husto.
Un accidente bastante fuerte cu a tuma luga poco mas despues cu e rotonde na Pos Chikito a cobra bida di e hoben Arends y a laga un otro chauffeur herida. E hoben tabata manehando un auto stuurwiel banda drechi y a bay dal practicamente frontal cu e otro auto. Varios testigo e tempo ey a declara cu tabata imposibel pa e hoben a perde control y tin indicacion cu posiblemente e lo a hala pa e auto cu e la dal den dje pa motibo cu e tabata biniendo den su line.
Pa mas cu 2 aña y mey e mama di e hoben lo a cana un caminda bastante largo pa por a yega na dossier di su yiu. Awor cu e file den nan man, sra. Arends ta lansa yen di pregunta den direccion di husticia y ta señala fayonan cu segun e a wordo cometi.
Fayonan
Un di e fayonan cu mas sra. Arends ta critica ta hecho cu tabata tin indicacion fuerte pa haci un test di alcohol cu e otro chauffeur, pero no a haci esaki. Den e auto tabata tin boter cu ta contene bebida alcoholico y tambe un jug. Otro fayo segun e señora ta cu a condena su yiu na e sitio mes door di bisa cu e a perde control y bay dal den trafico contrario mientras cu potretnan forensico ta mustra otro.
Bon Dia Aruba a tuma contacto cu sra. Arends y ta pendiente un entrevista pa asina papia mas amplio riba e tema. Tambe lo tuma contacto cu KPA y OM ya cu tin varios nomber cu a keda menciona den e caso aki.
