Ayera un grupo di mas cu 150  ciclista a tene un accion pa mas siguridad riba caya y asina pidi mas tanto conscientisacion di automobilistanan. Esaki tabata en conexion cu accidente cu a tuma luga diadomingo cu a laga dos deportista herida.

E ciclistanan a reuni na e parkeerplaats di Alhambra casino ayera atardi pa despues core direccion Phoenix Hotel pa bin bek direccion parlamento. Na parlamento e grupo a para un rato y un par di ciclista a drumi riba caya y para e trafico un rato pa hala atencion di e automobilistanan. Jeff Lopez, un di e atletanan cu a organisa e manifestacion, di parti di Swikers Tri Team, ta conta Bon Dia Aruba cu ultimamente tin hopi problema entre ciclista, atleta y automobilista riba caya. Manera cu nos a informa caba, diadomingo ultimo a sosode un accidente riba Sasakiweg unda un automobilista a dal dos ciclista coriendo un velocidad di 120km. Esaki pues a causa un inkietud enorme specialmente den comunidad deportista cual a inspira e accion aki di ayera.

Respet
“Nos tin cu duna otro respet. Mi ta kere e ta conta pa nos tambe como ciclista tin cu respeta e leynan”, sr. Lopez ta comenta. E deporte di ciclismo ta un deporte unda bo ta pega tras di hende; esun mas dilanti ta trek tur hende door di e biento. Esaki ta algo cu ta parti di e deporte mes caminda bo sa topa cu e ciclistanan banda di otro riba caminda. Akinan hopi biaha bo ta haya cu auto ta purba di pasa nan, pone presion y pita nan tras. “Algo cu realmente no mester pasobra si un rato bo ta nos tras, bo por djis tal un pito chikito anto nos ta hala for di caminda un rato sin problema. Awendia e problema ta cu hopi hende ta sin pasenshi.” E deporte aki a crece basta desde aña pasa segun sr. Lopez anto nan kier djis trece pa dilanti cu tur esunnan cu ta uza e caminda pa deporte ta preocupa cu e situacion y ta exigi respet.

Infrastructura ta falta
E grupo di ciclista na Aruba ta uno hopi grandi.  Segun nan lamentablemente nos infrastructura na Aruba no ta adecua suficiente pa un balansa necesario entre trafico y practica deporte. “E cabayero cu a causa e accidente tabata coriendo un velocidad demasiado halto cual no mester riba Sasaki. Esaki eigenlijk no mester a pasa, si bo core un tiki mas trankil y wak rond, por evita e cosnan aki .”  Hopi ciclista ta bisa cu tin necesidad di fietspad na Aruba. Segun sr. Lopez e ta haya cu fietspad hopi biaha ta mas recreativo. Ora ta trata di ciclismo ta papia di un otro nivel pasobra tin biaha nan ta core riba velocidad di 50/60km pa ora, dependiendo for di unda bo ta bin. E ta rekeri velocidad anto si traha fietspad pa e deporte aki e mester ta cera, segun e. “No tin realmente un caminda adecua na Aruba pa haci esaki.”

Reaccion gobierno
Presente tambe ayera tabata e ministernan di Salud y Asuntonan Social pa mustra nan apoyo na e causa. Minister Alex Schwengle di Salud ta laga sa cu: “Ora cu bo biba y haci deporte den diferente pais – no pa ta critico na mi mesun pueblo – pero bo ta ripara cu nos disciplina den trafico no ta esun di miho. ” Referiendo na e accidente, e mandatario ta bisa cu esaki ta sumamente pasobra no ta prome biaha y ta spera cu nos por siña di dje. “Nos tin nos leynan. Nos tin un rijbewijs cu ta test bo riba cierto calidad pa bo por maneha un vehiculo den trafico. Bo mester keda corda cu ora bo ta core un vehiculo, bo mester ta consciente cu esaki por causa hopi daño tambe. Bo mester uza bo tino. Aparentemente tin cierto hende den trafico cu no ta uza nan tino.” E mandatario ta sigui bisa cu locual a pasa diadomingo por a termina na un manera fatal tambe y pa e motibo aki comunidad di Aruba mester cuminsa tene mas cuenta pa no core pura den trafico. E ta enfatisa cu su ministerio tin mas programa di conscientisacion na caminda pero hincando placa den esaki no lo haci hopi si pueblo mes ta kies pa sigui core iresponsabel den trafico.

‘Solucion practico’
E casa di un di e ciclistanan accidenta – Faissal Barroso, esta e abogado Joselin Croes tambe tabata presente.  “E tabata un susto di otro mundo. Danki na señor e no ta grave anto mi por bisa cu e ta na bida.” Sra. Croes tambe ta un ciclista cu ta bisa awendia ora di subi caretera bo ta core un riesgo grandi anto mester bin un proteccion. “Mi conoce hopi hoben cu ta practica e deporte y nos careteranan ta asina peligroso. E ta duel si lo mester stop di practica e deporte pasobra bo tin e peliger di accidente tur dia. Mi ta spera cu por bin cu un solucion practico.”

Sra. Croes ta splica cu un solucion kisas por ta si tur ciclista ta core por ehempel riba diasabra of diadomingo mainta di 6’or pa 12’or, cera un banda di e caminda.  “Bo sa kico ta nan ruta y bo por cera algun caminda y haci algo pa proteha nan. Nan tur ta tata, nan tur ta yiu , nan tur ta famia cu kier yega nan cas sigur.”