Departamento di Salud Publico (DVG) ayera atardi a manda su rapport diario na unda nan a indica cu na hospital e cantidad di pashent admiti a aumenta door di variante nobo di Covid-19, esta Omicron.
Rapport di DVG a duna di conoce cu ayera 04 di januari Aruba a kibra e cifra record di contagio pa Covid-19 na unda cu 1.028 persona a ser contagia cu e virus aki.
Aunke segun loke expertonan ta informa tocante e variante aki unda ta señala cu e ta menos peligroso cu esun anterior Delta, hospital Dr. Horacio Oduber tin 21 persona interna na unda cu dos persona ta den unidad di cuido intensivo (ICU) y 19 ta riba piso general. Pa loke ta trata Colombia, tin actualmente 3 persona den ICU y ningun riba piso general.
Siman pasa den ultimo conferencia di prensa di Gobierno di Aruba Dr. Yuri Caceres a expresa cu na e momento ey hospital tabata bao control pero cu nan tabata wardando pashentnan door di e variante nobo.
Asina mes, el a splica cu capacidad di cuido intensivo ta suficiente y cu lo por tin algun pashentnan cu lo por wordo manda pa Colombia mirando cu Aruba mester di cama pa otro pashentnan cu no ta afecta pa covid sino pa otro malesanan of accidente di auto, por ehemplo.
Variante Delta tabatin mas o menos 6% di e pashentnan cu a drenta den hospital cu tabata positivo pa Covid-19, pa loke ta trata Omicrom nan ta espera un 40 pa 45% menos di esey, esey ta nifica cu nan ta espera cu riba e piso general cu entre 2 pa 3% di pashentnan positivo lo yega na e area aki y 1% lo yega na cuido intensivo.
