Manera cu ta conoci, hefenan di polis Caribense a bin hunto e siman aki na Aruba pa e conferencia anual di organisacion ACCP (Association of Caribbean Commissioners of Police). Ayera Fundacion pa Hende Muhe den Dificultad a host famianan, partnernan y yiunan di comisarionan den e region di Caribe y Merca. Unda e desea a bin dilanti pa traha mas estrecho pa combati violencia domenstico miho den Caribe.

Funcionado na Interpol Aruba Enrico Web ta esun encarga cu e programa durante e cinco dianan pa e famianan di comisarionan cu ta atendiendo e conferencia.  Ayera nan tabata riba un tour di e diferente fundacionnan riba nos isla anto un par di museo.  Mainta trempan ayera nan a bishita Sonrisa, Animal Shelter, Fundacion pa Hende Muhe den Dificultad,  Mary Jane Foundation, Cruz Cora Aruba , un par di museo anto Fundacion Respeta mi. Awe e actividadnan ta caba segun sr. Web caminda lo tin un koffiemorgen pa nan riba lama anto parti merdia nan ta bay haci compras pa despues bay e Commisioners Ball, cual ta e clausura di e siman di e conferencia na Hilton Ballroom mes.

Seminario violencia domestico den Caribe
Presidente di Fundacion pa Hende Muhe den Dificultad, Suzy Kock: “Pa nos esaki ta un placer pasobra semper ta bon pa tin mas hende cu nos por papia cu nan di kico ta pasando, con nos ta trata cu ne y kico e trabao ta cu nos ta haci.” Den e manera aki seguramente mas conscientisacion nan ta brinda den e ramo di violencia domestico. Sra. Kock ta sigui bisa nos cu e colaboracion cu otro fundacionnan y instancianan den Caribe ta hopi bon pero nan ta desea pa esaki ta mas miho. E ta splica: “E ta algo cu nos tin programa tambe pa e aña aki nos mes bay haci algo mas grandi di dje. Nos intencion ta pa bin cu un seminario akinan na Aruba. Trece tur e fundacionnan cu ta trata cu violencia domestico den area den Caribe pa bini hunto akinan.”

E ta sigui bisa: “Den e manera aki nos por bini hunto pa cera cabes pa mas solucion. Hopi biaha bo ta haya casonan cu porta e victima no por keda akinan na Aruba anto mester mand’e otro caminda. E tipo di colaboracion ey caba ta existi, pero nos kier extende esaki hopi mas. Trahando hunto semper bo ta logra hopi mas.”

Reaccion parehanan di comisarionan
Vanessa, un casa di comisario for di Trinidad ta bisa: “Mi ta haya cu ta hopi great locual nan ta haci aki na e fundacion pa hende muhe. Hopi biaha un muhe no ta sali for di un relacion pasobra nan no tin caminda pa bay.” Nos a puntr’e con e situacion di violencia domestico ta na Trinidad segun su opinion:

“Na Trinidad nos tin cas pa hende cu retonan fisico, pa hendenan cu ta yega edad grandi, pa muchanan cu enfermedad pero mi no ta mucho na altura riba casnan di shelter pa muhenan cu ta pasa den violencia domestico. Mi ta kere algo asina ki ta hopi grandi, positivo y necesario tur caminda.”

Un otro dama, sra. Hemmwattie for di Guyana ta conta nos: “Na Guyana nos tin algo similar cu e shelter aki pero e cos ta cu nos ta siña nos muhenan pa defende nan mes anto keda leu for di e victima.”

E ta conta nos cu na su pais nan tin mas cu un cas pa tuma victimanan di violencia domestico cu ta carga mas o menos 50 persona cada un. Sra. Hemmwattie ta bisa cu e problema di violencia domestico ta mas bao di control den areanan di ciudad pero asina toch tin hopi hende cu tin miedo di bin padilanti cu e informacion aki. “Nan tin miedo pa nan bida of algo cual nan ta kere lo bin bek y afecta nan bida.”