Mas asistencia militar di Hulanda pa yuda Bahamas

Hulanda ta manda mas asistencia militar na Caribe pa yuda cu e emergencia na Bahamas. Ayera 84 mariniers a sali for di Vliegbasis Eindhoven den un avion di transporte  KCD-10 di Koninklijke Luchtmacht cu destino Sint Maarten.

Nan ta forma parti di 21st Raiding Squadron di Korps Mariniers. Esey ta un squadron den Marine Spearhead Task Unit, un grupo dedica pa asisti cu emergencianan den Hulanda y tambe na stranhero.

Ora nan ta yega Sint Maarten nan lo subi e barco Zr. Ms. Johan de Witt pa bay Barbados. Hulanda tin dos barconan di Marine cu ta prepara pa asisti eynan. E otro ta Zr.Mr. Snellius.

Den total Hulanda lo tin 550 militar pa duna asistencia na Barbados. Nan ta bini for di marine, landmacht, luchtmacht, y marechaussee. A parti di esey, tin 50 militar Frances en 50 militar Aleman a bordo di Zr.Ms. Johan de Witt. Nan tabata eynan caba pa train hunto cu Hulanda den un ehercicio militar den Caribe, pero cu e catastrofe cu ta pasando na Barbados e ehercicio a para y nan a ofrece asistencia.

Zr.Ms. Johan de Witt ta un barco di transporte amfíbio. E por funciona como haf, aeropuerto y shelter na mesun momento. E tin luga pa vehiculonan y paketenan di emergencia, y un dok interno cu botonan chikito por drenta den y sali for di dje for di awa. Tambe tin 2 helicopter Cougar di Defensie Helikopter Commando y un unidad di mariniers cu 2 botonan FRISC, 4 botonan di tipo landingsvaartuig, y 2 teamnan specialisa di scuba divers. E militarnan di landmacht ta mediconan y specialistanan den ingenieria y cooperacion civil militar.

Zr.Ms. Snellius ta un barco hidrografico cu aparatonan sonar. Nan por wak bou di awa si tin obstaculonan den e hafnan di Barbados cu ta peligroso pa e barconan cu ta trece pakinan di emergencia of evacua hende for di a luga di e desaster.