(AP) – Fiscalnan federal kendenan ta tratando cu e caso di traficacion sexual di R. Kelly a bisa cu e tabatin contacto cu un mucha homber menor di edad, den adicion di e mucha muhenan, y e Gobierno kier pa e huradonan tende e alegacion y declaracionnan aki den e audicion binidero.

Abogadonan a trece dilanti un cantidad grandi di acusacionnan adicional, pero ningun ta cargo nobo contra di e artista di e genero musical R&B den corte riba diabierna. E seleccion di hurado lo cuminsa riba dia 9 di augustus den un corte federal na New York pa Kelly, ken ta nenga di a yega di abusa di algun persona.

Un mensahe a ser manda riba diasabra na su abogadonan tocante e acusacionnan nobo.

E cantante, ken ta ganado di Grammy, a ser acusa cu cargonan cu ta hiba abogadonan nombra un empresa di manager, siguridad y otro empleadonan cu aparentemente a yuda su persona haya hende muhe y mucha muhenan pa sexo y pornografia, y pa eherce hopi control ariba nan persona.

E cargonan ta envolve 6 diferente hende muhe y mucha muhenan, kendenan no ta nombra den e documentonan.

Aworaki, e abogadonan kier pa e hurado tende mas di 12 persona cu tin acusacionnan nobo, cu e Gobierno ta alega cu Kelly a abusa sexualmente y fisicamente, a menasa of maltrata di algun otro forma.

Entre un di nan, e Gobierno ta bisa tin un mucha homber di 17 aña ken tabata aspira di bira un musico, ken Kelly a conoce na un McDonald’s den aña 2006, y despues a invita na su studio na Chicago. Despues di a puntra e mucha homber kiko tur e ta dispuesto pa haci pa por ta exitoso den e industria musical, Kelly a haci un proposicion na e hoben aki, a tene contacto sexual cu e mucha aki sabiendo cu e tabata un menor di edad, segun e documentonan entrega pa e abogadonan di e acusantenan.

Tambe a ser revela cu den aña 2008, ora cu Kelly tabata enfrentando huicio pa e cargonan di pornografia infantil na Chicago, e mesun mucha homber aki a conta e cantante cu e tabatin acceso na un di e huradonan, y Kelly a pidi e mucha homber aki pa contacta e hurado en cuestion y bisa cu Kelly ta un “bon hende”, e abogadonan a skibi.

E documentonan no ta revela si e hoben aki a haci esaki of no. Kelly a ser declara liber di e acusacion y cargo aki.

E hoben aki tambe a introduci Kelly na un amigo di entre 16 cu 17 aña, cu ken segun e abogadonan aki Kelly a cuminsa un relacion sexual algun aña despues. Ademas di esaki, Kelly a procede na filma e dos mucha hombernan aki den encuentronan sexual cu otro personanan, algun di nan e parehanan di Kelly, tur mientras cu te ainda e hobennan aki tabata hoben y apenas adulto segun e documentonan entrega.

E intencion di e abogadonan na momento di trece e casonan aki dilanti aunke nan no ta agrega cargo nobo, ta pa ilustra un conexion den tur e eventonan aki y asina demostra cu tur e casonan aki ta parti di algo mas grandi.