(AP) – Jonathan Majors a ser condena riba dialuan a causa di agredi su ex pareha despues di un huicio cu el a spera lo comproba cu su inocencia y restaura su status como un actor cu un gran futuro su dilanti. E huicio a comproba lo contrario; Marvel Studios y Walt Disney Co. a despedi su persona oranan despues di e veredicto.
Un hurado na Manhattan a considera Majors, di 34 aña di edad, culpabel den e incidente cu a tuma luga den maart ora cu el a confronta su pareha den e tempo ey Grace Jabbari. Jabbari a acusa cu Majors a agredi su persona den un auto y a lag’e cu “dolor inmenso” mientras cu abogadonan di Majors a argumenta cu Jabbari tabata e agresor. Priya Chaudhry, abogado di Majors, a bisa den un declaracion cu “te ainda e tin fe den e proceso” y ta “spera di por completamente limpia” su nomber. Mientras el a ser condena pa agresion cu ta trata iresponsablemente causa un herida, Chaudhry a insisti cu su ekipo ta gradici pa motibo cu a retira e otro acusacionnan den su contra, cual ta concerni intencionalmente causa un herida. “Majors ta gradici cu Dios, su famia, su amistadnan y su fanaticonan pa nan amor y sosten durante e ultimo 8 lunanan aki,” Chaudhry a declara.
Marvel y Disney inmediatamente a despedi e actor di “Creed III” for di tur proyecto binidero despues di e condena, segun persona cercano na e studio a informa bao condicion di anonimidad pa motibo cu e no tin autorisacion di duna declaracionnan publico tocante esaki.
Prome cu su aresto, Majors tabata na caminda pa bira un figura central den e universo cinemtatico di Marvel, interpretando e rol di e antagonista Kang. Majors ya caba a hunga rol den Ant-Man and the Wasp: Quantumania” y e dos prome temporadanan di “Loki.” E tabata na caminda pa participa den Avengers: The Kang Dynasty,” cu tabatin plan di ser lansa den mei di aña 2026.
Majors lo ricibi su sentencia dia 6 di februari y ta enfrenta e posibilidad di ricibi te hasta un aña den prizon aunke libertad condicional of otro sentencianan cu no ta inclui tempo den prizon tambe ta posibel. Abogado di districto di Manjhattan Alvin Bragg a bisa den un declaracion cu e huicio ta ilustra un “ciclo di abuso psicologico y emocional y un habito den escala di coercion.”
