E referendum di e trahado di Marriott hotel na servicio di Ruth’s Chris Steak House, cu mester a tuma luga diahuebs ultimo, a keda posponi debi cu e gerencia di e hotel a entabla un caso contra Mediador di Gobierno.

Mediador di Gobierno, Anselmo Pontilius a declara na Bon Dia Aruba cu siman pasa e compania Marriott Ruth’s Chris Steak House Restaurant, caminda e referendum mester a tuma luga, a pidi hues pa trata e caso aki. Nan ta di opinion cu Mediador di Gobierno a exclui dos trahado cu ta traha den e restaurant menciona. Nan ta haya cu e trahadonan aki, cu ta riba nan 60 dia di prueba, a wordo exclui for di nan lista di votadonan.

Sr. Pontilius a laga sa cu den e reunion cu nan a yega di sostene den e preparacion di e referendum, e compania a informa cu nan a tuma cuater trahado den servicio dia 4 y 5 di december. Na e momento ey, ya caba e referendum tabata den proceso pa tuma luga. “E maneho ta cu e trahadonan den 60 dia di prueba no ta participa den niun referendum,” el a declara na e matutino aki. E maneho aki ta data for di decada di añanan 80. E maneho aki ta pa proteccion di e mesun trahadonan cu den e momento ey ta den periodo di prueba y vulnerabel pa eventualmente perde nan trabou pa nan afiliacion sindical.

Mediador di Gobierno a traha e lista di un total di 26 trahado cu derecho di voto. FTA a tuma nota di e lista, y nan a entrega un keho cu nan tin prueba cu e trahadonan ta ariba di 60 dia di prueba. Mediador di Gobierno a dicidi pa yama un reunion urgente dia 18 di december cu e partidonan. Den e reunion ey –segun Sr. Pontilius– a keda reconfirma cu dos di e trahadonan di e total cu por vota tin contract di 60 dia di prueba. Den e reunion aki, Mediador di Gobierno a informa cu nan tin cu exclui e dos trahadonan for di e lista di votado, ya cu esey ta e maneho. Pero e compania no a bay di acuerdo y nan a procede den corte.

Hues den prome instancia kier a trata e caso diahuebs ultimo 10or di mainta, y si tabata asina, Mediador di Gobierno tabata cla pa celebra e referendum e mesun momento ey. Despues di discuti e caso internamente, hues a dicidi di trata e caso dia 10 of 11 di januari venidero, pa dicidi si e trahadonan cu ta den nan dianan di prueba lo mester participa di e referendum. Esaki a haci cu Mediador tin cu a pospone e referendum. Inicialmente, nan a pospone e referendum pa dia 14 di januari venidero.

Sindicato FTA

Presidente di FTA, Hubert Dirksz, a bisa cu e trahadonan di e restaurant cu no ta Marriott mes pero si nan ta parti di e hotel, a bin cerca nan pa bira miembro di e sindicato. Segun e sindicalista, nan tin e mayoria di mita plus un di e trahadonan cu derecho di voto exigi pa e ley di referendum. Pero mirando e maneho cu departamento do Mediador di Gobierno a hiba, cu e trahadonan cu ta den nan periodo di prueba di dos luna di trabou no mag di participa den e referendum aki; gerencia di hotel a lanta un caso contra nan. E ta haya cu e ta un forma pa cuestiona e decision di Mediador di Gobierno pa e referendum aki no tuma luga. FTA ta bin constata cu e dos personanan cu berdaderamente ta den periodo di prueba; pero si nan ta vota na fabor of contra, nan votonan no ta bay tin efecto riba e resultado di e referendum.

“Nos ta haya cu no tin motibo pa cancela e referendum,” el a bisa. E sindicalista ta haya cu esey ta e decision di e Mediador pa haci esey basa riba e caso cu a wordo entabla contra dje.