Sindicato SIMAR ta inicia e aña cu diferente punto di agenda. Un di e puntonan cu tin riba e agenda ta cu e aña aki nan lo bay tin cambio di directiva. Secretario di e sindicato Sra. Maroeschka Cornelie a splica mas riba e eleccion di un directiva nobo cu lo tuma luga na luna di april.
Durante aña 2015 directiva a traha cu 5 hende, mientras cu un directiva tin espacio pa 7 hende. Durante casi 2 aña directiva di e sindicato a traha cu e 5 personanan aki, kendenan a percura pa participa na tur comision cu tin. Pero asina mes nan a haya ayudo di 1 solo miembro di e sindicato, esta Sr. Henry Barrera. El a yuda e directiva na participa durante un comision, pero tur e otro comisionnan e directiva mes a percura pa participa na nan.
Eligi directiva nobo
Segun Sra. Cornelie na Bon Dia Aruba, cu e aña aki ta uno hopi importante. Na e luna di april e temporada di directiva di sindicato SIMAR lo caba y esaki ta nifica cu lo mester eligi un directiva nobo. Directiva tin pensa di cambia e forma di votacion. Pero prome cu e eleccion tuma luga, directiva lo yama un reunion di nobo pa tur su miembronan. Durante e reunion aki lo bay repasa e reglamento di cas y ta bay aproba esaki, e secretario a bisa. Den e reglamento di cas ey ta bay bin e forma con e directiva aki ta propone e miembronan pa scoge un presidente y directiva pa e sindicato. Esaki lo ta diferente cu e manera tradicional.
Scoge na forma mas democratico
Lo scoge un president nobo na un forma mas democratico y cu espacio mas grandi pa e miembronan vota, e ta bisa Bon Dia Aruba. Normalmente e anochi di eleccion e miembronan ta vota e momento ey, cual ta e unico momento di vota. “Nos ta bay pone mas espacio pa vota, nos ta bay pone stem local y mas tempo pa vota. Kiermen bo ta bay haya mas hende pa vota e ora,” Sra. Cornelie a bisa Bon Dia Aruba. E miembronan di directiva actual por wordo reeligi, pero nan mester pone nan mes disponibel. “Un miembro di directiva actual mester laga sa si e kier pone su mes disponibel,” e ta sigui bisa. A puntra Sra. Cornelie si e lo pone su mes disponibel di cual e di te cu awo si.
“Nunca bo por complace tur hende. Esey ta dificil. Nunca bo lo complace tur bo miembronan, nunca lo bo complace tur hende eyfo y convence pa nan bira miembro tampoco. Pero mi por bisa si cu e sosten cu nos tin ta hopi grandi,” e ta bisa. Esey ta a base di comentario, a base di e-mail cu nan ta haya, e directiva tin sosten hopi grandi di e miembresia.
Encuesta di SIMAR
E aña aki SIMAR lo tin un encuesta na comienso di aña pa mira kico e miembronan ta pensa, kico nan ta spera, kico nan kier mas of menos. Pero e encuesta aki no lo conta solamente pa e miembronan, pero e directiva lo invita esunnan cu no ta miembro pa acerca nan pa informacion. Aña pasa nan no a haci e encuesta ya cu nan no por a haci esaki pa motibo cu nan no tabata tin suficiente ayudo.
Un cos cu nan ta bay haci tambe e aña aki ta invita grupo di scolnan pa asina duna splicacion di e trabou sindical y e importancia di ta miembro. E sindicato ta mira cu hopi hende no ta mira e importancia pa sostene nan.
