Fraccion di AVP a entrega un carta awe na Parlamento despues di un encuentro ( bijeenkomst ) di diaranson cu Gobierno riba tema di e posicion di Hulanda pa cu Aruba.
A haci diferente pregunta y por a mira posicion di cada un di e fraccionnan representa pa nan parlamentarionan kico y con nan ta pensa riba locual cu tin riba mesa.
Na momento di contesta Prome Minister Evelyn Wever Croes no tabata presente den sala di Parlameto.
Prome Minister a bandona sala y a laga Minister Xiomara Maduro pa duna contesta y pa nos sopresa ta scucha cu ayera diamars ( fecha di deadline pa duna contesta ) cu Gobierno a manda un “contra proposicion” pa Gobierno di Hulanda, cu ta algo di lamenta mirando cu e discusion hiba riba e proposicion inicial cu tabata tin riba mesa caba y cu den menos di 24 ora gobierno a manda un contra proposicion sin conocemento di parlamento / sin present’e na parlamento y esaki no ta corecto, ta locual Marlon Sneek a enfatisa.
Parlamento ta esun cu ta controla Gobierno!
Gobierno a bay haci un contra proposicion sin cu a acorde, papi’e, splic’e, present’e na parlamento cual sigur ta condenabel y ta pa e motibo aki a entrega un carta y pidi urgentemente na Prome Minister pa e manda e contra proposicion pa e fraccion di AVP pa asina por ta na altura di kico ta su contenido.
Marlon Sneek ta remarca riba e echo cu Prome Minister a yama reunionnan, papia cu gremionan, sinta y papia riba contenido y despues cambia esaki y manda bisa kico ta bo punto di bista pero esnan cu bo a combersa cune mes bo no a informa y no sa si bo tin e draagvlak / si nan ta para bo tras si of no. un estilo di poppenkast caminda a pone nan sinta scucha y despues manda un documento cu contenido cu ningun hende ta na altura di dje, mucho menos parlamento cu ta esun cu ta controla Gobierno cu no tin niun idea kico tin den e contra proposicion cu a manda.
Sneek a bisa tambe cu ta hopi hende por a sigui e reunion di diaranson y por a scucha/ mira cu Parlamento di Aruba den un carta / den un mocion cu a pasa siman pasa, no ta para tras di e proposicion cu Gobierno a haya for di Gobierno di Hulanda.
Si enberdad kier ta transparente y en berdad kier pa Aruba para tras di decision cu ta tuma anto e ora mester ta habri y e contra proposicion tambe mester ta conoci. Ta tilda Gobierno di Hulanda cu ta manda un documento cu no por comparti cu niun hende pero e Prome Minister di Aruba mes ta manda un documento sin comparti esaki, cual ta di condena y ta haci’e dificil pa para banda di un gobierno cu no ta transparente.
Gran diferencia compara cu Partido AVP
Na 2014 por a mira cu Partido AVP si a para pa Aruba. No a bay sconde para na banda y wak kico ta e probecho politico cu por saca for di situacion, no, AVP a para pa Aruba y ta p’esey a duna nos punto di bista tambe cu no ta di acuerdo cu e forma cu Hulanda kier atende cu pais Aruba y cu e Gobierno di Aruba y ta pesey a vocifera nos punto di bista, segun Marlon Sneek.
Ta spera cu pronto por haya contesta riba e carta pa sigui informa comunidad di kico realmente tin den e contra proposicion manda pa Hulanda. Locual cu e Prome Minister a bisa den reunion diaranson anochi no ta confirma cu e la bisa Hulanda NO, locual el a bisa ta cu el a manda un contra proposicion y esaki ta e informacion cu fraccion di AVP kier sa.
