ORANJESTAD – Ayera durante un conferencia di prensa di DOW hunto cu Directie Natuur en Milieu, Departamento di Polis, Bureau City Inspector y DIP, a splica varios aspecto di campamento y reglanan di medio ambiente, pa yuda comunidad pa ta exitoso den e aspecto aki den e temporada venidero di Semana Santa.

Sr Jaime Croes director di DIP, a bisa cu manera tur hende sa e topico ‘campamento’ ta papia di ubicacion y tereno, DIP tin e aspectonan aki bou dje y pa añanan e departamento aki a duna polis tur autoridad, pero cu e maneho nobo cu ta bin den proximo aña, nan lo haya un apoyo di e cuater departamento pa nan sigui traha riba esaki.

Pa loke ta campamento, Croes a comenta nan tin cu haci e proceso di manera ordena y responsabel, tambe y diferente leynan cu mester tin den cuenta, pa otro aña el a expresa cu nan lo kier bay introduci e uzo di tereno, pa haci di un manera responsabel pa loke ta trata medio ambiente.

Sr Gisbert Boekhoudt, director di Directie Natuur en Milieu, a bisa cu Semana Santa ta un celebracion pero tambe ta un tempo pa para keto, di loke ta trata e uzo cu e comunidad ta haci di e beachnan como un recurso natural y pe esey Directie Natuur en Milieu ta trahando riba dje.

Boekhoudt a expresa cu e uzo di diferente parti di e beachnan pa nan lo por keda den bon condicion pa tur hende lo por haci uzo di dje, no e comunidad cu ta haci campamento so sino tambe e turistanan cu bin bishita e isla.

Boekhoudt a agrega cu nan tin diferente leynan cu ta vigente, entre otro ta e Openbare Wateren en Stranden na unda diferente articulo ta stipula kico por haci y kico no, coremento cu auto riba e beachnan asina tambe como tiramento di diferente articulo of sushi cu tambe ta prohibi.

Desde dos aña pasa, Boekhoudt a manifesta cu nan tin e ley cu ta proteha e diferente matanan y bestianan y ta conoci cu e hende ta gusta saca streanan for di lama pa saca potret y pone bek den lama, e acto aki tin varios aña prohibi y nan ta recorda esaki pa e hende lo disfruta di e beachnan, bestianan, matanan, si nan kier saca potret haci e pero di un manera responsabel y laga nan na unda nan ta.

Esey ta conta tambe manera Boekhoudt a bisa, pa esunnan cu ta haci campamento cerca di e mangel y haci un yamada pa respeta e mangelnan como un mata cu ta duna sombra pa sconde di e solo.

Di banda di e cuerpo di Polis, sr Lito lacle a declara cu e tareanan den temporada di campamento ta mantene e orden publico y percura pa e mobilidad, el a splica cu loke nan ta haciendo den e momentonan aki ta pa wak tur e loke ta e condicionnan di e permisonan cu ta wordo ehecuta, sino ta e caso nan ta kita e permiso for di e persona.

“E campaña di conscientisacion ta hopi importante den esaki y mi ta kere conhuntamente cu nos cuater departamento nos tin cu bay over riba dje”, Lacle a afirma.

Sr Marlon Croes director di DOW, a manifesta cu e departamento lo bay tin dos rol den e caso di campamento, con e hende lo bay wordo uza e beach, con ta bay stipula e condicionnan di permiso y tambe a bisa cu “trailer no ta permisibel pa pone riba beach, si e persona lo kier bay cu su trailer pa Eagle beach y no ta posibel, nan lo por bay otro caminda pero semper y cuando e no ta subi riba e beach”.

Croes a splica cu esey ta e principio di e maneho di gobierno pa cu e aña aki y pa otro aña transitorio e tabata sucede riba e cuerpo policial pero e otro aña lo sucede baho di DIP.

Di loke ta trata e parti di acceso, Croes a comenta cu e nan a haya basta pregunta di e comunidad cu ta wordo puntra si e proyecto di Watty Vos Boulevard cu tin un envergadura basta grandi e ta bay cubri gran parti di Juan Irausquin Boulevard y lo bay stroba of elimina campamento e aña aki y otro aña, Croes a aclara cu esaki no ta e caso, e parti di trabou di e contratistanan no ta na haltura di Eagle Beach, esey ta defini caba y e area di campamento eynan ta pa for dje.

Tambe a bisa cu si lo bay tin na area pa Noord di banda di Costa Linda algun trabounan cu lo tuma luga pa nan lo embeyece e area y crea un parke publico y preserva e matanan di Kwihi cu tin den area ey di un manera responsabel y tambe lo percura pa tin acceso pa e beachnan pero no cu vehiculo.

PR di Bureau City Inspector sr Robby Rosel a expresa cu e departamento tin e deber di controla e parti di limpiesa riba e beachnan, nan lo bay saconan disponibel pa esunnan cu ta campando y tambe a bisa cu den plannan nan tin pa wak e hendenan pa no bay uza lo cual ta palet riba e beach pa mantene limpi y conhuntamente cu e otro departamento nan lo bay yuda tambe cu e parti di control caminda cu e muchanan lo ta bay sali yuda den e parti aki.