Den henter mundo, ta existi miyones di mucha den edad escolar; con por prepara nan pa prospera den un mundo cu ta cambia hopi lihe? Of con nan por siña diseña un mundo miho pa nan mes y pa e planeta?

Designathon Works, cu 15 aña di experiencia den diseño di programa educativo cu contexto hopi varia na diferente pais, di Afganistan te Hulanda, tin e creencia cu tur mucha lo por contribui na diseña un mundo miho y nan ta trahando pa cumpli cu e desafio aki, mediante desaroyo y expansion di nan metodo y forma di pensa den scolnan. Esaki a traves di organisacionnan y di nan actividad ‘Designathon Global Children’s’ cu ta celebra rond mundo.

Marlies Don, coordinador di Social Inspiration Lab a duna di conoce durante un entrevista special pa Bon Dia Aruba cu diasabra awor 16 di november, 29.632 mucha di 41 pais ta reuni na mesun momento pa trata e topico di cambio di clima y alimento; e actividad local lo tuma luga na International School of Aruba, desde 9or di mainta te 3.30 di atardi.

E actividad ta trata di mucha cu lo bay traha henter dia riba e tema y cu lo cuminsa cu un presentacion pa splica kico e problema ta, despues nan ta bay pensa riba nan mes pa haya un idea pa wak kico nan mes por haci, caminda cu nan lo bay pinta y despues construi un prototipo.

Tocante esaki, Don a conta cu e muchanan lo traha algo cu lo por yuda soluciona e problema di cambio di clima y cuminda. E ta un tayer structura den cual mucha entre 4 pa 12 aña ta inventa, construi nan mesun solucion pa un problema social of ambiental, den cuadro di e Obhetivonan di Desaroyo Sostenibel. Nan lo tin guia di personanan profesional den area di educacion, cu e meta di por haya experiencia y ayudo pa prepara pa futuro y siña diseña y uza tecnologia como un motor chikito.

Despues cu e muchanan termina nan prototipo, mayor y expertonan den cambio di clima y alimentacion ta wak e ideanan cu nan a traha y si un di e ideanan ta hopi bon e organisacionnan ta tuma e idea y ta trah’e na un escala mas grandi pa uza esey.

Tambe Don a comenta cu tin hopi pais rond mundo cu problema di cuminda y alimentacion, den su opinion ta bon si hendenan por come menos carni, cultiva mas berdura, recicla y siña otro encuanto desperdicio di alimento.

Marlies ta un persona cu a bin for di Hulanda y tin un aña y mey na Aruba. El a conta cu el a haci algun workshop y entrevista cu algun persona y el a ripara cu tin pobresa na Aruba y ora el a scucha e historia di e personanan cu ta sufri di pobresa, e no por a kere.

Tambe, el a mira cu loke ta mas relaciona cu e problema aki ta cu hopi alimento ta bin for di exterior. El a pensa cu lo ta bon si e personanan por cuminsa planta y cultiva fruta y berdura pa no ta asina dependiente di esey.

Don a trece dilanti cu pa henter mundo ta bisto cu e problema di clima ta birando pio cada dia y ta mucha ta futuro. Pero tambe tur hende mester cambia algo den nan forma di pensa y den nan forma di biba pa nos por yuda mehora clima. Y cu e actividad aki e muchanan por siña pa resto di nan bida, pa motibo cu e metodo ta basa riba pensamento den forma di diseño, nan por contempla e situacion cu un solucion na mente.

Ta p’esey esaki yama Designathon, cu ta enfoca riba diseño, por ta cu asina ta wak e problema di otro manera, mas orienta riba solucion.

Pa loke ta e impacto y influencia di Designathon di aña 2018, tabatin como proyecto e Laboratorio di Inspiracion Social di Hope Aruba, cu ta pa involucra y conecta e personanan cu participacion den e transformacion nacional, pa por tin individuo, famia hopi bon informa y capacita, comunidadnan cu ta traha hunto, uzando nan voz pa produci solucion pa bienestar colectivo.