(AP) – Bob Marley su legado musico di harmonia y paz a subi caya cu su yiunan homber treciendo nan tata su mensahe na bida den un tour cu lo tin stop na varios ciudad.
E gigante di reggae su pasonan lo ser yena pa su 5 yiu homber, Ziggy, Stephen, Julian, Ky-Mani y Damian, durante Marley Brothers: The Legacy Tour. Esaki lo amrca e prome biaha cu e rumannan lo duna un concierto hunto den 2 decada.
E rumannan Marley lo honra e trabao di nan tata, pa medio di canta mas di 30 di su canticanan incluyendo hitnan masivo manera “No Woman, No Cry,” “Could You Be Loved,” “Is This Love” y “Three Little Birds.” E tour di 22 fecha lo cuminsa den Vancouver y lo conclui den comienso di october na Miami.
“Esaki tabata hopi importante,” Ziggy a bisa tocante e Tour mientras su rumannan Stephen y Julian tabata banda di dje na un training recien na Los angeles. E ganador di varios Grammy a bisa cu ta importante pa nan colectivamente busca tempo den nan schedule druk pa duna homenaje na nan tata, ken lo a cumpli 80 aña den februari di proximo aña.
“Ora cu e oportunidad surgi, nos por uni, balora y aprecia esaki,” el a sigui. “Esey ta e parti mas grandi, pa nos por haci esaki hunto. Tempo ta keda move.”
E rumannan tin nan propio zonido di reggae individualmente, pero a haya un manera pa combina tur esaki cu otro. Nan tin desde chikito ta canta hunto incluyendo un presentacion na Red Socks Colorado aña pasa. Dos of 3 di nan a subi escenario den otro shownan manera ora cu Damian y Stephen a canta na Hollywood Bowl luna pasa.
Julian a bisa cu añanan di colaboracion a crea un sinergia di musica profundo entre e cu su rumannan, un extension natural di nan linaje comparti.
“Su mensahe aki ta bay mas leu cu bareranan. E ta kibra nan,” Julian a comparti. “No ta importa cua pais bo bay, e personanan tin mester di e mesun mensahe. Esaki ta e motibo dicon e ta asina duradero y nunca ta caduca. Esaki ta e motibo dicon nos ta aki haciendo e mision ki.”
Marley a sali for di Kingston, Jamaica, parti di Trench Town y a yega status di celebridad den 1970 cu hitnan manera “Get Up, Stand Up” y “I Shot the sheriff.” Su letranan ta promove husticia social y unidad Africano y esaki a haci su persona un icono global prome cu el a fayece di cancer den 1981 cu 36 aña.
Sinembargo, Marley su legado a sigui biba via varios proyecto incluyendo un exhibicion na New York y su autobiografia “Bob Marley: One Love,” cual a debuta na number 1 den februari.
Riba diadomingo, e rumannan a ser presenta cu un proclamacion cu ta declara dia 22 di september como “Marley Brothers Day” na Queens Borough di New York.
Su yiunan a mantene nan tata su herencia mientras nan a crea nan propio caminda exitoso incluyendo Julian, ken a gana su prome Grammy den februari.
Ziggy y Stephen cada un a gana 8 Grammy; Damian a bay cas cu 5 trofeo y Ky-Mani a yega di ricibi un nominacion.
Conhuntamente cu e tour, e rumannan a bisa cu nan ta purbando di traha riba un album hunto y pusha nan tata su mensahe di positividad dilanti. El a bisa cu e lo tuma tempo pero nan ta spera di por logra esaki “den futuro cercano.”
“E ta trata e mensahe den e musica,” Stephen a bisa, ken ta curador di e Tour su setlist. “Pa mi, e mensahe ta hopi necesario awo. Nos tata ta un di esnan poderoso cu a logra hiba su mensahe. Pesey nos ta aki.”
