Mark Zuckerberg ta bisa cu speculacion cu e tin un acuerdo secreto cu presidente Donald Trump ta ‘ridiculo’. Den un entrevista cu Axios publica ayera, CEO di Facebook a rechasa e rumornan y a defende e politica di e red social rond di discurso politico.
“Mi tambe a scucha e speculacion aki, pues laga mi ta cla: No tin ningun acuerdo di ningun tipo”, Zuckerberg a bisa. “En berdad, henter e idea di un acuerdo ta ridiculo.”
Zuckerberg a enfrenta critica pa defende e respuesta di e compania pa permiti postnan controversial di Trump. Facebook tambe ta enfrentando un boycott di aviso e luna aki, organisa pa gruponan defensor di derechonan civil cu ta bisa cu e compania no ta haciendo suficiente pa combati lenguahe di odio.
El a reconoce cu e tabatin reunion cu Trump, pero a bisa Axios cu e hecho cu el a reuni cu ‘un cabes di estado no mester ta sorprendente, y no ta sugeri cu nos tin un sorto di acuerdo’.
CEO di Facebook segun reporte a cita varios desacuerdo cu e presidente, incluyendo su politica di inmigracion y su ‘retorica divisivo y inflamatorio’.
