“Nos no ta negocia riba nos proposicion,” ta e mensahe cu Prome Minister di Hulanda Mark Rutte a manda pa paisnan CAS, cu ta Corsou, Aruba y St. Maarten. “E ta un proposicion sin obligacion, pero si e paisnan no acepta e condicionnan, nan no ta haya e placa,” un Prome Minister Hulandes determina a bisa Caribisch Netwerk.

E proposicionnan ta riba mesa desde juli, y e condicionnan tambe ta conoci. E paisnan mester di placa urgentemente y ta spera cu Den Haag lo por suavisa e condicionnan. Tur tres ta teme cu nan ta perde nan autonomia y cu democracia lo sufri si nan acepta e condicionnan di Hulanda.

“Nos tin hopi pacenshi. E ta keda na e islanan pa dicidi. Nos lo por haci algo cu e gobiernonan, te ora cu nos ta sigur cu tur cos ta bon hinca den otro,” Rutte a sigui. “Mi ta comprende cu e ta complica. Pero toch e ta importante pa yuda otro.”

Rutte mes no ta reuni specificamente cu e tres Prome Ministernan di e paisnan CAS y ta laga e tema na encargo di Secretario di Estado Raymond Knops, cu tin un team di ambtenaar ta negocia cu Aruba. “Y ami no ta papia di speranza. Mi ta haya cu mester maneha. Tin un proposicion riba mesa di parti di Hulanda pa yuda. Nos lo sigui yuda riba tereno medico, y cu cuminda. Esey lo sigui. Pero nos kier yuda drecha economia structuralmente, pero a cambio mester bin cu reformanan cu a keda drumi pa mucho tempo caba.”

Rutte a enfatisa cu e proposicion di Hulanda no ta uno pa negocia y no ta impone. Si e paisnan kier e ayudo, anto mester acepta e condicionnan.

Bon Mucha

Minister Plenipotenciario di Aruba Guilfred Besaril di su banda a expresa desapunto grandi y a keha cu Aruba semper ta esun mas bon mucha den klas y toch ta haya straf. “Nos a tuma e medidanan cu mester a tuma,” el a declara. “Ta trata di un gobierno serio. Y awor ta castiga nos. Esey ta e mensahe.”

Besaril a tira culpa si riba e team di negociador di Hulanda, cu ta ambtenaarnan di Ministerio di Asunto Interior. “Ni ami ni Sr. Knops ta reuni. Pero mi tin e impresion cu e team di Hulanda no ta inform’e corectamente.” Riba e comentario cu Rutte mes a bisa cu no tin negociacion posibel, Besaril a reacciona bisando cu “mi no ta tum’e na malo. Pasobra na final ta e ambtenaarnan ta tuma decision. Si Marke Rutte of Raymond Knops kier rabia, nan mester rabia riba nan mesun ambtenaarnan.”

Sorprendi

Di su banda, Raymond Knops no a bisa di ta rabia, sino sorprendi. E tono di Aruba te cu e siman aki tabata hopi diplomatico pa Hulanda. Pero e siman aki Prome Minister Evelyn Wever Croes a acusa Secretario di Estado Raymond Knops di un biaha mas cambia e condicionnan na ultimo momento pa por ricibi e di tres tranche. Segun Prome Minister, envez di 204 miyon florin pa tres luna, Hulanda ta laga Aruba cu un buraco di 136 miyon florin, ya cu e di tres tranche mester cubri cinco luna awor. Y pa esaki ta buscando fianza. Locual a anuncia ta cu tin interes pa fia, y tanten cu no finalisa e proceso, no por anuncia cual instancia y cual ta e interes cu mester paga. Pero cu e tabata contento di ripara cu tabatin hopi disponibilidad pa sigui presta Aruba.

Pero, esaki no ta haci un diferencia pa Hulanda.“Nos a haci un oferta y ta na interes di pueblo di Aruba pa yega na un acuerdo. E pais mester di placa. Mi a wak e tristesa na Corsou. E situacion mester mehora.” Knops a sigui bisa cu Hulanda kier yuda cu medionan financiero, a cambio di reformanan pa sigura inversion. Pero si Aruba no acepta e proposicion, e placa simplemente lo no bin nos pais.

Riba e pregunta si Aruba por fia internacionalmente, Knops a enfatisa cu e peticion mester pasa Conseho di Minister di Reino y e lo tin consecuencia pa henter e pakete. “E lo por nifica cu e perfil di risico ta cambia y ta bin condicionnan adicional.”

Pa Knops e ta un sorpresa cu Aruba kier fia pa cubri dos luna di necesidad financiero. “Nos a papia e ultimo dos lunanan cu Aruba y mi ta reconoce poco di e carta cu nos a ricibi di Prome Minister Wever Croes.” Knops a bisa cu tabatin acuerdonan riba algun parti di e proposicion, mientras cu awor Prome Minister di Aruba ta bisa cu esey no ta e caso.

No tin condicion adicional

Knops finalmente a nenga cu a bin cu condicionnan adicional pa e di tres tranche. El a splica cu a reuni pa dos luna riba e tema. Pero cu tanten cu no a yega na un acuerdo, nunca tabata e intencion pa manda e placa. Pues no por a kere cu e mesun termino di tempo ta sigui. “Si ta warda pa yega na un acuerdo, di mes di tres tranche tambe ta hala den tempo.”

Mester bisa si cu dia 10 di juli, Bon Dia Aruba a tene un conversacion cu Prome Minister Evelyn Wever Croes kende a declara cu no por a bay di acuerdo cu e condicionnan di Hulanda y cu gobierno tin un reserva cu por usa tanten cu ta sigui negocia. E intencion di e reserva aki tabata pa usa den caso cu e crisis di Covid bira mas grave. Den e grabacion, Prome Minister a argumenta cu awor lo usa e reservanan ey pa cubri e lunanan di Juli y Augustus. E no a bisa cu gobierno ta pospone cierto pagonan pa despues, aunke den un rueda di prensa reciente el a bis cu gobierno tabata poponiendo ciert pagonan, sin specifica.

Presion riba divisas

Expertonan conoci na Bon Dia Aruba ta mira e intencion pa haci prestamo cu hopi preocupacion. E probabilidad cu Aruba ta bay fia internamente ta esun mas grandi ya cu Conseho di Minister di Reino no tin nada di bisa si haci esey. Sinembargo, tin consecuencia directo pa henter economia di Aruba.

“Ayudo di Hulanda ta bin na dollars of euro y ta transforma na florin ora di drenta Aruba. Nos pais ta importa tur cos. Si distribui florin via fianza local, e ta nifica cu ta come den e poco divisas cu ta resta. Ta divisas cu mester bay pa paga importacion di cuminda, remedi y otro necesidad. Tur instancia crucial manera WEB, Hospital ta depende di divisas. Si saca florin, sin cu a percura cu tin dollars of euro a cambio, ta un of dos biaha so por usa e placa,” ta e preocupacion expresa.

Nota di redaccion: A trata di haya reaccion di Prome Minister riba e expresionnan di Premier Rutte, pero nos no a ricibi esaki te cu ciere di redaccion.