Durante e temporada no lo mira hopi horcan lo forma. Ya caba dos ola tropical a forma, cual ta Alex y Bonnie. E ola tropical Bonnie a forma hopi na halto di cual no tabata tin efecto pa Aruba. Aunke cu un sistema tropical ta leu di e isla, e por tin cualkier efecto pa Aruba. Hopi hende ta kere cu Aruba ta pafo di e faha di horcan y ta bisa turista esey. Pero segun Sr. Mark Oduber, hefe di Departamento Meteorologico Aruba, cu Aruba ta pazuid di e faha di horcan pero no pafo di esaki. Un propaganda cu a wordo haci a pone cu hopi hende a kere esey.
Sr. Oduber a bisa cu, Bonnie no tabata tin efecto pa Aruba pa motibo cu ora el a forma, esaki tabata hopi panort, pero Alex tambe tabata hopi panort y asina mes e tabata tin efecto. Lama a bira bruto y subi tera causando daño. El a pone cu dos persona a fayece riba lama. “Bo ta wak cu indirectamente e sistema tropical cu ta hopi leu, por tin efecto. Esey nunca descarta con leu nan ta,” segun Sr. Oduber na Bon Dia Aruba.
Dos sistema tropical a forma, ta dificil pa bisa si e temporada lo ta activo no. Loke cu Departamento Meteorologico a mira ta cu e patronchinan climatologico den lama Pacifico y Atlantico, ta indica cu ta bay anticipa cu condicion lo ta faborabel. Esaki ta pa motibo cu 1. e olanan tropical tin mas forsa, e ora djey nan por desaroya y bira ciclon tropical y 2. ora un ciclon tropical forma e por desaroya y haya mas forsa compara cu e ultimo dos pa tres aña, unda cu nan tabata den un periodo masha cortico, bira ciclon tropical djey muri y caba na nada, segun Sr. Oduber. Nan ta anticipa cu esey lo ta asina e aña aki. pa e motibo ey Departamento Meteorologico Aruba ta anticipa cu e temporada di yobida pa Aruba lo bay boltia compara cu e secura cu ta asotando e isla pa hopi aña.
Aruba no ta fei belt di horcan
Hopi hende ta bisa cu Aruba ta bou di e belt di horcan y ta bira bisa turistanan cosnan asina. Pero den e ultimo ayanan e horcannan ta forma un tiki mas abou y a puntra Sr. Oduber si esaki lo tin mas efecto riba Aruba. “Nunca nos ta pafo di e belt. E tabata gewoon un propaganda cu a yega di bay rond hopi aña pasa. Cu mi ta corda e no tabata cuadra cu berdad. Hopi hende a tum’e y ta kere cu ta berdad. Pero esey no ta e caso,” el a bisa. Na aña 1978 si Sr. Oduber no ta kiboca un horcan categoria dos a pasa pazuid di Aruba. Tur hende por mira cu nan ta pasa pazuid di e isla y p’esey Aruba ta na e parti di pazuid di e faha di horcan pero no pafo di e faha di horcan. “Manera mi ta bisa bo no mester tin cu e mester pasa riba bo, pero e por pasa panort di bo. Indirectamente e ta haci cu e tempo malo di Venezuela por hala bin noord y causa inundacionnan grandi na bo isla. E por haci lama indirectamente bruto, manera por ehempel Alex unda dos persona a fayece.” Tin pagina di website ta bisa cu Aruba ta for di e belt y turistanan ta kere esey. Ora cu nan yega, di biaha nan ta puntra hendenan local riba esaki, kendenan ta confirma turistanan cu esey ta berdad. A puntra Sr. Oduber riba esaki y con pa percura pa hendenan ta mas consciente riba e parti aki. “Mi no sa, paso mi mes tabata tin reunion cu ATA y AHATA. Nan tur sa cu nos ta na e parti di e faha. Riba nan website tin poni cu nos ta na e parti pazuid di e belt di horcan, pero no pafo di dje.” Aunke cu nan tin esaki riba website, asina mes hende no sa pasobra e mensahe no ta yegando cerca comunidad. Pero pa hendenan haya sa riba esaki, el a indica cu por duna training na esunnan cu ta traha na hotel pasobra si haya un hende cu no sa, e ta tira un gaña na turista. Pero si train nan, por ta nan sa mas miho. P’esey Departamento Meteorologico Aruba ta percura pa duna lectura na hotelnan.
