Diadomingo mainta pa 10:20 maritiem polis a haya melding di kuststation cu algun piscado local ta piscando ongeveer 9 miya pazuid di Aruba. A mira algun boto venezolano ta piscando y tira palamber den nos awa territorial cual a sigui despues na un persecucion. Cuerpo Policial a comparti e siguiente informacion pa medio di un comunicado.
Maritiem polis mesora a prepara y yama RCC Curacao pa controla via radar si e botonan aki ta den nos awa, y si por guia Maritiem polis na e posicion. RCC a controla anto a resulta cu net e botonan a cuminsa move bai bek zuid pa drenta awa nan di Venezuela. A keda monitor nan movecion. Pa mas o menos 11:30 RCC a meld bek na Maritiem polis cu actualmente nan a wak e boto. Nan a bolbe bek den nos awanan di Aruba direcion e posicionnan cu probablemente a tira e palambernan.
Maritiem a sali mesora y RCC a guia nan direccion y contact nan. Yegando cerca Maritiem a constata hopi boei ta drief y tur tin otro color y bandera. Tawata tin 2 boto Venezolano na e sitio. Ora nan a wak boto di polis nan a bai full speed zuid direccion di awanan di Venezuela. Maritiem a persigui tur 2 boto duna na señal pa para pero e botonan aki no a para ni sigui ordo di polis. Den 1 boto maritiem a wak 4 persona. Nan tawata busca obheto duro y te hasta 1 a gara cuchiu pa prepara pa e polisnan ora di board e boto.
Despues di algun minuut di persecucion, RCC ta meld Maritiem polis cu nan ta bay drenta awa di venezuela. Na un distancia Maritiem polis tambe a wak Warda Costa Venezolano ta bin direccion di e boto di polis. “Pa motibo cu e botonan aki a logra drenta awa di venezuela nos no por a sigui persigui nan. Maritiem a bira bek y bay direccion e palambernan den nos awa. Pa motibo cu ningun boto venezolano kier a para responsabel pa e piscamento illegal den nos awa, maritiem a saka tur e palambernan di laman,” vocero di Cuerpo Policial di Aruba Lito Lacle ta informa. Di 11:45 te 16:00 personal di Maritiem polis a keda saka liña y boei di awa. A gara un total di mas cu 30 boei cu liña y algun mester a wordo corta.
