Den e primera parti di e entrevista di Bon Dia Aruba cu parlamentario y lider di partido MAS, Marisol Tromp a toca e tema di entre otro encuentro publico tocante metemento politico den OM y a contesta e pregunta di pakico el a trece un mata pa prome minister demisionario den parlamento. Den e segunda parti aki Tromp ta elabora riba e motibo pakico MAS ta na fabor di un Rijkswet y e tema di migracion, labor y capacidad di carga.

Na algun ocasion Tromp a indica cu partido MAS ta na fabor di introduci un Rijkswet. El a splica cu esaki no ta pa perde autonomia, pero ta mas bien pa e situacion no bira pio na Aruba, y cu un disciplina presupuestario regla cu mester a tene na dje por evita empeoramento.

“Nos ta pro Landspakket tambe pasobra nos ta kere cu bo mester sanea, no obstante ki color politico tin, mester pensa na futuro, y esey ta nifica cu aworaki mester haci esaki pa yega na un situacion financiero mas stabiel,” el a remarca.

El a sigui splica cu Parlamento di Aruba no ta ricibi su cuentanan anual financiero como debe ser. El a indica cu MAS a dirigi varios pregunta na minister di Finanzas tocante esaki mirando cu apenas dos rapport a keda entrega na parlamento y tin un retraso basta grandi.

El a enfatisa cu ya ta cinco/seis aña cu parlamento no tin nada pa realmente controla pasobra e rapportnan aki parlamento ta usa pa haya sa si di berdad tin surplus, si di berdad e gastonan a tuma luga.

Pa loke ta e tema di migracion, labor y capacidad di carga, esaki ta un tema cu Tromp cu den añanan cu a pasa semper el a pone accento na dje door di trata di invita ex minister Glenbert Croes den parlamento ken tabata encarga cu e cartera aki e tempo ey y tabata repsonsable pa e parti di Dimas y e maneho di admision.

Tromp a resalta cu e tempo ey e minister a bisa cu e ta bay bin cu un ‘alterantive legal pathway’, cual e parlamentario ta indica ta simplemente nifica un ‘free for all’.

El a sigui splica cu prome cu e ex minister a retira, el a bisa cu e ta bay kita e aarbeidsmarkttoets cual ta sigura cu ora cu tin un trabou disponibel e departamento tin cu wak prome si tin otro hende local cu por haci e trabou prome cu recuri na un hende di afo.

Tromp a expresa cu esey ta nifica cu no ta bay duna oportunidad na cualkier otro ciudadano local cu ta den situacion precario y cu por haci e trabou e oportunidad pa ocupa e posicionnan ey, pero ta bay djis busca un persona di afo.

Esaki, el a enfatisa, tambe ta trece un peso cune riba infrastructura, e calidad di bida cu no tin mane antes mas door di tur e presion cu tin. “E ta un topico hopi importante y na varios ocasion a haci ex minister pregunta, e ta bin parlamento bisa tur cos ta bon, ta splica diferente aspecto cu nos sa cu no ta bon pasobra ora nos cuminsa wak carta cu ta bin afo unda e ta duna okay di antemano pa personanan drenta, saltando consehonan di su departamentonan, pa mi no ta okay,” el a subraya.

Tromp a remarca cu no solamente e aspecto ey ta preocupa su fraccion, pero tambe e bienestar di Aruba en general, teniendo na cuenta cu Aruba ta un isla chikito. “Bo tin cierto superficie cu no ta crece y bo mester sa kico bo kier cu Aruba,” el a agrega. “Bo ta bisa okay turismo ta creciendo tin mas proyecto cu ta bin y ta rekeri mas hende etc., pero bo mester defini ki sorto di profesionnan bo kier pa bo pais, ki desaroyo bo kier pa Aruba, solamente turismo of otro ramo. E ta un topico cu tin asina tanto faceta.”

Un topico cu Bon Dia Aruba a trece dilanti tambe ta e desaroyo di fluho di arma cu ta drenta den Caribe vooral via Merca. Na Aruba violencia di gang ta birando mas activo aworaki, pero poco ta ser scucha tocante e tema aki di parti di politiconan.

Tromp a subraya cu kisas nan no ta papia di e tema aki den parlamento, pero e ta un preocupacion, sigur pa su partido. “E ta un preocupacion vooral si bo ta wak cu no solamente pa gangnan y criminalidad ariba Aruba, pero e areanan na costa hopi biaha ta prensa ta mustra kico ta sucede si no pueblo no sa, si ta drenta hende, si nan ta arma si ta cu droga, e frecuencia y kisas e ta un parti chikito di tur e realidad,” el a indica.

El a remarca cu e ta un preocupacion grandi y cu ta trabounan pa e parti di husticia percura pa vigila esaki y unda por impedi esaki. “Ta algo cu bo no ta mira tanto skirbi den un programa di partido, pero e ta un preocupacion,” el a agrega.

Por ultimo, pa loke ta e trayectoria di Tromp den diferente partido politico y cu na final a conduci na establece su propio partido, el a splica cu el a cuminsa su carera politico den partido MEP. Despues di 13 aña den e partido, el a indica, cu nan a sak’e afo pa motibo cu el a vota pa un ley den cual ta corta nan propio pensioen pa salba e pensioenstelsel di pais Aruba mes e tempo ey. Esaki, el a indica, a causa malcontento den e partido y a sak’e afo.

Despues di esaki el a bira independiente y despues a uni partido AVP caminda cu tambe tabatin casonan andando e tempo ey ya caba. Despues di e caso cu Dammers e tempo ey, el a expresa cu el a sinti cu no tabatin e sosten of comprension pa loke el a pasa aden y e ora e mes a dicidi di sali afo.

Despues di esaki el a bolbe bira independiente pa basta tempo te ora el a uni partido POR. Durante su tempo cu POR el a fungi como lider di fraccion trabou cu el a indica e tabata haci bon y trankil te ora Otmar Oduber y e partido a pidi’e pa bira minister.

El a sigui splica cu despues di mas o menos ocho luna cu el a asumi e responsabilidad aki e partido a bisa cu nan no ta contento cu cosnan cu Tromp tabata trece dilanti. Esaki a pone cu MEP, POR y RED a dicidi den parlamento cu nan ta retira Tromp pa spearfishing.

“Mi a purba bringa mi caso den parlamento, mi a splica intensivamente kico mi a topa y kico mi a pasa aden, pero toch nan a dicidi cu nan ta baha mi. Esey a conduci cu mi a bay cas y e ora mi por bisa despues a bin partido MAS pasobra pueblo a pidi mi sigui y esey ta e partido cu mi ta lidera awo,” el a indica.

Tromp a subraya cu en bes di mira esaki como un hende cu ta bula di partido pa partido, e ta mustra cu e ta determina y cu e ta para pa su principionan. “Si ami no ta para pa mi principio lo mi a keda den e partido cu lomba tur krom y mi no tin un lomba krom. Ami ta wak e mas bien como algo di persisti y den un pensamento di acaso e ta bon pa e pueblo,” el a enfatisa.