Mediante un carta fecha 2 di september 2024, lider di fraccion MAS den Parlamento, Marisol Tromp a dirigi 15 pregunta na minister di Transporte, Ursell Arends, hunto cu prome minister Evelyn Wever-Croes y minister di Finanzas, Xiomara Maduro, relaciona cu e maneho pa ATV/UTV.

Riba su rednan social, Tromp a post e carta cu el a manda y a splica su motivacion, bisando cu for di “basta aña pasa caba, Gobierno y Minister di Infrastructura Evelyna Wever Croes a ricibi conseho extenso di un comision encabeza pa DOW y cu participacion y cu experticio di varios departamento di Gobierno riba con pa para of minimalisa e destruccion di nos naturalesa, e peliger riba caminda publico, y e molester cu e filanan di UTV/ATV ta ocasionando pa añas caba aki na Aruba,” el a skirbi. “E consehonan aki a jeg’i wordo poni ter inzage den un reunion publico na Parlamento.”

E preguntanan cu a dirigi na Minister di Transporte, Ursell Arends ta:

1. Minister a anuncia den pasado cu lo introduci un moratorio riba importacion di e vehiculonan ATV/ UTV na Aruba. Esaki realmente a tuma lugar of a wordo ehecuta?

2. Si e contesta na pregunta nr. 1 ta positivo, Minister por describi kiko exactamente e moratorio riba UTV/ATV ta encera?

3. Si e contesta riba pregunta nr. 1 ta afirmativo, con a implementa e moratorio aki y desde ki fecha?

4. Cuanto aña e comision interdepartamental di Gobierno a traha riba e conseho( nan)?

5. Cual ta tur e departamentonan cu a participa den e comision(nan)?

Na prome minister, Evelyn Wever-Croes, a dirigi e siguiente pregunta:

6. For di aña 2021 Minister President a ricibi conseho comprobando cu e UTV/ ATVnan ta forma un peliger real riba nos careteranan publico, pasobra nan no ta diseña pa core riba caretera di asfalt. Aparentemente Aruba ta e unico pais cu ta permiti esaki. Minister por entrega e proposision pa rutanan alternativa pa UTV/ATV na Parlamento?

7. Dicon Gobierno nunca a implementa esaki, siendo cu for di como 4 aña pasa ya esaki wordo sugeri?

8. Practicamente tur dia tin accident cu UTV/ATV riba nos isla, un mas grave cu otro, pa un gran parti cu turistanan envolvi. DTI ta logra controla di tur e vehiculonan aki si nan ta cumpli cu tur exigencia di un keuring prome cu nan subi caminda?

9. Minister por comparti e relatonan di DTI cu Staten caminda ta ilustra cuanto di e UTV/ATVnan anualmente a wordo goedgekeurd den e ultimo 3 aña?

10. Con por ta posibel cu Gobierno pa añas ta sigui permiti destruccion continuo y diario di naturalesa (mata y bestia) den cierto areanan di Aruba, ocasiona pa e filanan continuo y diario di centenares di e vehiculonan di ATV/ UTV?

11. Claramente Adventure Tourism ta wordo propaga tambe door di e stakeholders den turismo, ya cu e turistanan lo ta gusta esaki. Minister no ta haya contradictorio cu ta permiti destruccion di naturalesa deliberadamente, door di un banda haci promocion/ propaganda pa Adventure Tourism cu ATV/ UTV y alabes keda sin introduci rutanan alternativa pa e tours aki?

A dirigi dos pregunta tambe na minister di Finanzas, Xiomara Maduro:

12. Cuanto ATV/ UTV a wordo importa na aña 2021, 2022 y 2023?

13. Recientemente por a tuma nota cu e compania All To Car a anuncia cu nan a importa ATV/ UTV electrico nobo na Aruba y a bisa cu lo no tin molester di zonido mas den barionan. Pakico Gobierno a permiti importacion di e vehiculonan aki cu lo sigui destrui naturalesa su mata y bestianan, ya cu Gobierno te cu awe no a introduci ningun ruta alternativo?

Finalmente, Tromp ta cera e carta cu dos pregunta mas na prome minister:

14. Ki dia Ministernan Wever-Croes, Arends y [minister di Husticia, Rocco] Tjon ta papia un solo idioma pa cu e topico di UTV/ ATV pa cu nan responsabilidadnan ministerial riba e tema aki?

15. Unda e ‘eenheid van beleid’ ta den conseho di Minister pa cu e tema di e peligernan riba caminda, molester den barionan residencial y destruccion di naturalesa?

Moratorio riba ATV/UTV
 Na januari 2022, gobierno di Aruba a anuncia cu prome minister hunto cu minister Arends tabatin un reunion cu e comision institui pa prome minister un aña prome, pa atende e problema di UTV/ATV. Den e reunion aki, e comision a propone pa regula e mercado y busca un balans entre desaroyo economico y turistico, teniendo cuenta cu medio ambiente.

Durante e reunion a tuma dos decision:
(1) Lo introduci legislacion pa stop importacion di e vehiculonan pa un tempo y

(2) Lo bin cu un moratorio riba dunamento di permiso, pa trece poco trankilidad den e mercado na Aruba. Mientrastanto ta sigui traha pa bin cu un ruta alternativo pa uso di e UTV/ATVnan. Banda di esaki ta calculando kico ta e maximo cu Aruba por carga di e vehiculonan aki.

Despues, na juli di 2022, prome minister a anuncia cu “ta trahando riba rutanan alternativo cu ta den fasenan hopi avansa caba y tambe ta trahando riba e diferente leynan cu mester bin.” Prome Minister a resumi bisando cu e trabaonan ta avansando cu e diferente departamentonan, y prome siman di juli lo cuminsa ricibi e rutanan alternativo, tambe con e leynan ta wordo hinca den otro pa por regula e sector aki miho. E meta ta pa sigura cu e sector aki por sigui opera na un forma sigur pa tur hende, respetando naturalesa y brindando e servicio/actividad na turistanan.

Dia 9 di augustus ultimo, minister di Transporte a traves di un comunicado di prensa a bolbe menciona e plannan pa e maneho nobo pa UTV/ATV, pero no tabata mustra di tin hopi avance. “Ya pa varios aña ta purbando di yega na un miho balans entre turismo aventurero y proteccion di naturalesa. E uso di UTVs y ATVs a trece un aumento di accidentenan cu daño fisico y material, daño na nos naturalesa (flora, fauna y propiedadnan geo-morfologico), disturbio pa ciudadanonan (zonido y stof) y obstaculisacion di e fluho di trafico,” a bisa den un comunicado di prensa.

 

“Gobierno di Aruba a instala un comision multidiscipliniario y un taskforce pa controla

cumplimento di ley y reglamento relaciona cu vehiculonan di motor cu ta usa pa huur.

A reduci caravana na solamente 10 vehiculo, pero esaki no ta suficiente,” e comunicado ta reconoce.

 

A informa cu Ministerio di Naturalesa y Transporte ta hiba un maneho di regula y reduci e permisonan pa opera e vehiculonan UTV y ATV den transporte publico. A base di consehonan ricibi di Directie Natuur en Milieu y Departamento di Transporte Publico, den cooperacion cu e

instancianan cu a forma parti di e comision di conseho, lo introduci diferente cambio, entre

nan rutanan alternativo pa UTV y ATV den transporte publico, pa minimalisa e disturbio den

nos naturalesa.” Pues ta duna di compronde cu introduccion di rutanan alternativo, y cualkier otro cambio den esaki, ainda ta keda pa futuro.