Minister Marisol Lopez Tromp kier pa e reunion publico cu fraccion di POR a yama pa entrega un mocion di desconfianza continua. Esaki el a pone den un carta cu a manda pa Presidente di Parlamento mr. Juan ‘Ady’ Thijsen. Ta trata aki di un di dos carta cu el a manda pa Presidente di Parlamento, desde cu el a bolbe Aruba.

E carta ta bin tambe despues cu Sra. Lopez Tromp a participa na e reunion di mediacion cu entre otro Prome Minister Evelyn Wever Croes den presencia di entre otro lider di fraccion di POR, Sra. Dellanire Maduro. Lopez Tromp a bisa cu e no por a duna declaracion riba e contenido di e reunion di mediacion ya cu a palabra cu ta Prome Minister Wever Croes lo splica kico a sosode y kico ta e siguiente pasonan.

Sinembargo, e Minister a bisa for di momento cu a yama e reunion na prome instante cu no solamente e kier ta presente, pero kier hiba palabra tambe pa splica su maneho.

Manera ta conoci, Parlamento a yama e reunion apenas cu e Minister a biaha pa Hulanda cu su yiu. Asina mes, el a bolbe dos dia despues pa atende e reunion, durante cua fraccion di POR lo a entrega e mocion di desconfianza, despues cu a acusa Marisol Lopez Tromp di ta tuma decision contra e palabracionnan haci den Conseho di Minister. Entre otro, cu e Minister lo a tuma decision pa stroba acceso di UTV/ATV den Parke Nacional Arikok y tambe ta resisti e maneho cu su colega di partido Minister di Husticia, Andin Bikker, kier hiba riba piscamento cu harpun.

E reunion di dia 31 di juli a keda suspendi riba peticion di e propio fraccion di POR despues cu lider di fraccion di RED Ricardo Croes a mustra cu e documentonan di e comision di intermediacion bou presidencia di mr. Arie Swaen no tabata completo. E Minister entretanto a hiba un discurso den e prome tanda unda el a trece hopi punto cuestionabel cu el a topa den su Ministerio y a bisa di lo amplia riba mas caso den e di dos tanda. Pero e di dos tanda nunca a continua, ya cu a suspende e reunion.

Despues di a bolbe Aruba, Marisol Lopez Tromp a manda un carta pa Presidente di Parlamento Ady Thijsen pa mustra cu e sentencia di e caso sumario cu e Aruba Offroad Foundation contra Fundacion Parke Nacional Aruba a ilustra cu ta e ultimo ta encarga pa tuma decision di locual ta sosode den e areanan bou su maneho, y no e Minister en cuestion. Pues e argumento di POR contra Marisol Lopez Tromp no ta valido. Lopez Tromp a mustra su disponibilidad pa e reunion por continua.

Pero un siman a pasa y no a tende nada. Pa ley, mester reanuda e reunion, aunke den pasado tabatin casonan unda reunionnan publico no a continua. Sinembargo pa Minister Marisol Lopez Tromp, e ta importante pa por cera e capitulo aki, pa asina e por sigui cu su trabou como e titular encarga cu Ordenanza Teritorial, Infrastructura y Medio Ambiente den tur trankilidad.

Y ta pa e motibo ey mes, e ta pidi Presidente di Parlamento pa pone un fecha pa asina por continua cu e di dos tanda di e reunion.