Pa algun siman tabata tin basta rumor riba futuro politico di Marisol Lopez – Tromp. Tabata durante e di dos conferencia di prensa yama e siman aki pa partido POR, den presencia di varios candidato na Cayena Mall, a anuncia cu oficialmente sra. Lopez – Tromp lo forma parti di ‘E Forsa Nobo’.

Sra. Lopez – Tromp ta bisa e necesidad cu tin pa un di tres forsa politico na Aruba y cu pe ta un honor di por traha cu e partido aki. Segun e ta splica, den su (ex)funcion manera presidente di parlamento, ta hopi cos bo ta wak of precisamente keda sin wak, referiendo na e falta di transparencia cu tin di parti di gobierno. Interesante tabata e hecho cu el a expresa su mes bisando cu ta algun persona den partido ta manda y e otro nan no tin nada pa bisa. “Cual tabata e ultimo biaha cu bo a tende minister president bin cu un proyecto y discutie den ministerraad, hunto cu parlamento pa wak si bo ta pro of contra?", e parlamentario ta puntra.

Propaganda ‘fake’
Durante su discurso, sra. Lopez – Tromp ta papia riba e aspecto di no a haya oido di su ex partido. Segun e, ta varios biaha e lo a haci sugerencia cerca diferente minister riba retonan cu por wordo mehora pero no a worry cu ne. E ta sigui splica cu na momento bo tin situacionnan dificil bo mester trece dilanti y no traha propagandanan bunita bisando cu tur cos ta bou di control of cu ciudadanonan ta satisfecho. E candidata nobo di POR a menciona varios biaha cu locual e gobierno ta haciendo ta propaganda ‘fake’.

Liderazgo
Na inicio di e partido a referi hopi biaha na e palabranan ‘liderazgo  comparti’, implicando cu tanto Otmar Oduber y Andin Bikker lo ta lidera e partido. Pero awe durante conferencia di prensa a demostra di toch ta diferente. Sra. Lopez – Tromp enfaticamente a yama sr. Oduber pa lider di e partido, poniendo sr. Bikker un banda. “Cu un lider na cabes y diferente hende riba lista cada un cu nan capacidad,” tabata palabranan di sra. Lopez – Tromp ora cu e la bira wak sr. Oduber.

Bon Dia Aruba a tuma nota cu e pida di e discurso aki a wordo publica riba e pagina di Facebook di partido POR manera un tipo di “highlight”. Si tuma resultado di eleccion 2013, na e momento aki sr. Oduber, sr. Bikker y sra. Lopez – Tromp ta representa un total di 8.698 voto cual ta casi 3 asiento y mey. Locual historia a demostra, cu sra. Lopez – Tromp mes, e chens ta grandi cu bo ta perde mas cu mita di bo votonan ora bo bay di un partido pa otro. Cu esaki lo ripiti su mes ta keda un contesta cu nos lo haya te despues di eleccion 2017.