Den un move sorpresivo diahuebs atardi te na e momento ey lider di partido MAS, Olmo Henriquez, a anuncia dilanti di edificio di Camara di Comercio, di traspaso di liderazgo na Marisol Lopez Tromp, como e lider y presidente nobo di e partido.
Señor Henriquez a comenta cu den e traspaso no tabatin nada di compra, of huur, pero cu tur cos a bay segun statuutnan, y den pleno aceptacion di banda di e directiva existente.
E ocasion na instalacionnan di KvK tabatin di haci cu e formalidadnan cu e presidente saliente y esun entrante a bay haci, pa finaliza e documentonan cu ta duna prueba di e traspaso di responsabilidad aki. Señor Henriquez cu no tabata desea mas di sigui como lider, a duna su sucesora un petchi di MAS
Segun e lider nobo, e no a yega sin mas na scoge pa partido MAS. E no tabata contempla bay cu ningun otro partido prome cu el a yega na e escogencia aki. Su escogencia ta basa riba filosofia di MAS cu ta cuadra cu loke Marisol Lopez Tromp tambe ta vocifera.
Riba pregunta di prensa Marsol a referi na e casonan den corte cu e dun’e razon, despues di a soporta tur e critica di su opositornan den su mesun partido. Finalmente awor, segun Lopez Tromp, el a haya razon den caso di Serlimar (surseance van betaling) , den caso di vehiculo den Parke Arikok, y den caso di retiro di director di Serlimar. Tambe Lopez Tromp a referi tambe na e manera, segun su concepto totalmente ilegitimo y contra tur regla di bon gobernacion. Cu e paso remarcable aki sigur lo bin mas sensacion y bida den e actual campaña electoral.
