Ni Prome Minister ni Minister Glenbert Croes kier responsabilisa na Parlamento

Fraccion di MAS ta urgi Prome Minister Evelyn Wever Croes pa entrega e rapport di Centraal Accountants Dienst, CAD riba e maneho financiero di Aruba Huis na Parlamento. Lider di e fraccion drs. Marisol Lopez Tromp ta enfatisa cu locual Prome Minister mes a bisa di e rapport ta duna di compronde cu e investigacion ta cla. Contrario na e declaracion publico di Evelyn Wever Croes cu ainda e no por comenta pasobra e investigacion di CAD ta andando.

Miembro di e fraccion di MAS, Aquanette Gunn, firma pa drs. Lopez Tromp a manda carta pa Prome Minister pa por haya e rapport pa lesa, pa asina duna claridad y transparencia riba kico ta sosodiendo na Aruba Huis. “E mes a bin na mas cu un ocasion pa splica cu tin un investigacion andando door di CAD. Despues nos a tende cu Departamento pa Recurso Humano, DRH a haci investigacion. Loke nos a pidi recientemente ta pa manda copia di e rapport di CAD pa Parlamento, caminda nan lo a investiga supuesto iregularidad na Aruba Huis.” Lopez Tromp a bisa den cuadro di transparencia y integridad lo kier e documentonan.

“Nos tin tur derecho pa ricibi e relato di locual a sosode pasobra ta trata aki placa di pueblo.”

Pero, manera tabata e caso cu Minister Glenbert Croes, ta parce cu Prome Minister Evelyn Wever Croes tampoco ta cumpli cu e instruccion di Parlamentarionan pa bin duna splicacion. “Nos ta mira cu Minister President a bisa algo cu ta hopi straño. El a bisa cu e rapport no ta cla. Pero ta un investigacion cu a inicia hopi luna pasa. Pero den mesun rosea, Prome Minister ta bisa cu ta trahando riba sugerencianan cu CAD y DRH a duna.” Pa Lopez Tromp, esaki ta un contradiccion, pasobra pa por tin e sugerencia y recomendacionnan, mester tin e rapport den posesion. “Den ki forma cu e ta, nos tin derecho pa pidie y como Prome Minister, e tin e deber pa entrega esaki na Parlamento. E mester bin den sala di Parlamento pa splica di e contenido y manda e rapport pa nos.” E Parlamentario a splica cu den un investigacion di e indole aki, ehecuta pa CAD semper tin sugerencia kico pa haci despues cu a analisa un situacion. “Kiermen nos mester ricibi e rapport.”

Lo bolbe manda un carta pa Minister President Evelyn Wever Croes pa haci e rapport di CAD publico. E hecho cu Minister Plenipotenciario Guillfred Besaril a retira no ta kita di e urgencia pa Parlamento por sa kico a sosode na Aruba Huis. “Nada den e proceduranan cu tin den Parlamento y ta hancra den Constitucion, ta stroba pa nos pidi pa e documentonan.

Rappel 2

Pero mescos cu ta urgi Prome Minister pa ta transparente cu Parlamento riba kico a sosode na Aruba Huis, ta insisti cu Minister Glenbert Croes mester duna cuenta pa e caso cu el a perde den corte di LAR.

Fraccion di MAS y Accion21 a bolbe manda un carta pa Presidente di Parlamento mr. Edgard Vrolijk, despues di a tuma nota di e contesta di Minister encarga cu Labor, Energia y Integracion Sr. Glenbert Croes kende den un carta ta bisa cu e no ta haya apropia pa duna comentario den un caso cu ta andando. Aki Minister Croes ta referi na e tratamento den corte di Prome Instancia cu ainda mester tuma su decision. Den e caso di LAR, hues a bisa cu e Minister a actua contra ley ora cu el a kita autoridad di Director di DIMAS, mr. Kathy Paskel.

Pero den e di dos rappel, e dos fraccionnan ta recorda e Minister cu conforma articulo III.17 di Constitucion di Aruba, un Parlamentario tin derecho pa haci pregunta na Minister pa su maneho y cu no mester di aprobacion di Parlamento of Presidente di Parlamento. Ora di ehecuta e tarea di control di Parlamento ta haci uso di e derecho pa informacion y e derecho di haci pregunta ta un derecho di cada Parlamentario y e ta hancra den Constitucion.

Tres forma di responsabilidad

Segun Constitucion, Gobierno ta obliga pa duna cada Parlamentario informacion cu e ultimo aki ta pidi. E tres formanan di responsabilidad pa esnan cu ta carga e tarea ehecutivo tur ta basa riba e intencion pa Parlamentarionan por dirigi nan mes na e sirbido publico special, su maneho, ehecucion y decisionnan y actonan. “Esun mas yamativo di e responsabilidad aki ta e variante politico unda Ministernan ta responsabel pa un organo representativo eligi, pa e maneho cu nan ta hiba y e forma con nan ta duna contenido personal na e funcion,” e carta ta bisa, enfatisando cu nan accionnan ta suheto na supervision publico.

E aplicacion di e derecho di haci pregunta cu ta den Constitucion ta nifica tambe cu e Parlamentario tin derecho riba contesta. E punto di salida ta cu representante di pueblo tin derecho riba informacion y netamente pa e motibo aki e derecho aki den e structura di Parlamento tin un posicion asina prominente. “E unico ora cu un Minister por keda sin contesta ta den caso cu e contestanan por haci daño na Pais Aruba of Reino. Y e carta di Minister Croes no ta afecta ningun aspecto di interes di Pais Aruba y/of Reino Hulandes, pues Minister no por keda sin contesta.”

Reunion publico

Esey ta motibo tambe pakico e dos fraccionnan un biaha mas ta recorda (rappel) di nan peticion di 1 di Juni 2022 pa e Minister, mas pronto posibel duna claridad riba e consecuencianan di e decision di hues relaciona cu e caso cu mr. Kathy Ruiz Paskel a entama na LAR y a gana.

E Parlamentarionan a urgi Presidente di Parlamento Vrolijk pa un biaha mas invita Minister Glenbert Croes, mas pronto posibel, pa un reunion publico cu e unico punto di agenda, “e sentencia di 30 di Mei 2022, cu ta confirma e actonan ilegal contra mr. Kathleen Ruiz Paskel y e consecuencianan pa e decisionnan di Minister cu a keda suspendi.

E carta aki, ta sigui e prome recordatorio cu e fraccionnan a manda dia 13 di Juni, 2022.

Segun Lopez Tromp, Minister Glenbert Croes no kier responsabilisa su mes a pesar di e hecho cu “hues a laga su proceduranan na werki. hues a bisa cu el a tuma e pasonan robes. E ta hopi straño pa nos cu un Minister cu tanto aña den e trabou aki, ta tuma pasonan pa hala un hende un banda y haci esaki den un forma incorecto, contra ley, contra Constitucion y contra e Ley Instalacion Ministerio. Ta p’esey nos a pidie pa bin splica kico e consecuencianan di e sentencia aki, ki consecuencia e tin pa e proceduranan diario den DIMAS y kico a cambia despues di a ricibi e sentencia aki. Nos kier sa.” Lopez Tromp a bisa cu hopi hende ta acudi na DIMAS y mester tin claridad riba e decretonan Ministerial di Glenbert Croes. “Presidente di Parlamento mester yama e reunion publico den tanto dia y den e di tres carta aki nos ta splica hopi cla cu e Minister mester bin y aki splica. Si e kier papia hopi of tiki, pero ta splica den Parlamento,” ta e declaracion di Marisol Lopez Tromp. “Nos ta hefe di Gobierno,” el a enfatisa, y ta kere cu kizas huristanan di e Minister por splik’e di e articulo den Constitucion cu ta ilustra esaki.