“Ta spera cu por keda cla pa e aña aki,” presidente di Parlamento, Marisol Lopez-Tromp a comenta, referiendo na e tratamento di e Areglo di desacuerdo, despues cu el a bin for di Corsou den cuadro cu celebracion di nan Dia Nacional, hunto cu representantenan di tur tres fraccion den Parlamento.
E ta splica cu ta purba di yega na un forma cu por trata Areglo di desacuerdo cu tur hende por bay di acuerdo cun’e. Como Parlamentonan, nan kier caba cun’e. No kier keda rek esey mas y mas.
Den e reunion fiho di parlamento di Aruba, e presidente ta atende, den e caso aki Sr. Rene Herde, ta trat’e cu e demas presidentenan di Sint Maarten y Corsou. Tin biaha ta reuni riba e topico via video conferencia y na e momentonan cu ta hunto, durante IPKO of cualkier otro ocasion, tambe ta trata e topico aki. No ta lag’e los. Ya cu el a yega asina leu, ta trata di yega na algo beneficioso pa nos pais, Lopez-Tromp a splica.
E reunion cu a wordo teni pa dos ora mas of menos
E esencia ta con cu bira esey of bolter esey, ta sinti cu mester yega na un acuerdo cu por wordo respeta hunto di e parlamentonan pa loke ta e topico aki. Ta pa basta tempo ta boga pe. Hasta e cuater Parlamentonan a yega hunto na un consenso aña pasa y Gobierno a pone esey un banda. Parlamentonan tin cu wordo respeta, segun Lopez-Tromp. Banda di esaki importante ta pa yega na un solucion riba e topico aki. Cada biaha cu haya oportunidad, ta tuma esey pa asina reuni y a haci esaki na Corsou pa wak si por yega na proposicionnan pa por haci cambionan cu kier.
Lopez-Tromp a agrega cu entre e parlamentonan mes ta keda trata pa yega na un solucion cu ta den practica funciona. Esey ta loke a bringa den tur e añanan aki y cada reunion cu tene ta purba di yega mas cerca di esey y ta purba di wordo carga den tur e parlamentonan.
Den pasado nunca tabata tin riba tur cos consenso y a logra esey aña pasa cu tur cuater parlamento, cual ta hopi unico. Awor aki tin cu wak con ta e forma pa efectua esey y a reuni na Corsou un rato riba dje, Lopez-Tromp a splica.
