Marisol Lopez Tromp ta declara su mes parlamentario independiente como presidente di Parlamento di Aruba

ORANJESTAD – Presidente di Parlamento Marisol Lopez – Tromp, ta bisa despues di a tuma tempo pa pensa y pasa riba tur locual cu el a pasa den dje den su carera como politico y su profesion prome cu esaki y e rol cu e tin den su bida personal, e ta tuma e decision 3 siman despues di e incidente entre e cu Chris Dammers den Parlamento, pa distancia su mes for di AVP y bira parlamentario independiente. Cu esaki e ta bisa di ta continua cu su trabou como presidente di Parlamento pa cual el a wordo elegi pe te cu september.

Contexto

Marisol Lopez – Tromp a tene conferencia di prensa urgente un rato pasa unda cu e ta splica con e ta sinti despues di e incidente cu a tuma luga den Parlamento entre e cu vice presidente di Parlamento Chris Dammers. El a expresa di ta hopi disgusta pa e comentarionan cu el a lesa den prensa local y Hulandes di coleganan pa loke ta e incidente cu a tuma luga, unda cu e ta sinti ataca, sin cu a worry pa papia cun’e pa soluciona e problema y pues ta haya inacceptabel locual a sosode y con a atende cu esaki despues. Den corto e ta bisa: “Mi ta sinti cu mi fraccion a laga mi cay”, y ta distancia su mes for di AVP.