Marisol Lopez Tromp ta Minister ainda. Asina el a informa Bon Dia Aruba. Lopez Tromp no ta considera e votacion riba e mocion di desconfianza contra su persona como uno legal, ademas cu e argumento uza no ta valido tampoco. Te cu merdia, Lopez Tromp no tabatin un combersacion cu Prome Minister Evelyn Wever Croes, kende unicamente a mand’e un whatsapp pa bis’e cu e no a sigui reunion publico pa motibo di reunionnan.

Los di e ilegalidad di e votacion, segun Lopez Tromp, tin e esencia di e mocion su contra: “E argumento den e mocion no ta corecto. Nan a pone cu ta parce manera mi no ta bay ehecuta e maneho di tolerancia, esta e gedoogbeleid. Esaki, mientras cu mi a bisa na varios biaha, cu mi a busca hopi conseho pa trece e miho producto di ley. Y ademas. Ta Minister di Husticia Andin Bikker mester ehecuta e gedoogbeleid atravesa Warda Costa y Minister di Sector Primario, Cris Romero, mester ehecuta e registracion y duna cursonan. Ami a haci mi parti caba y lo sigui proteha naturalesa.”

A puntra Minister Lopez Tromp si el a papia cu Dellanira Maduro, lider di e fraccion di POR, e partido cu a nombr’e como Minister, y e contesta tabata simpel. “No.” Pero e no ta bay considera e mocion mes, pasobra “e no tin validez si e tin menos cu 11 voto na fabor. Si acaso bira asina den Staten, cu menos di 11 hende ta sostene un decision, e ta nifica cu ta actua contra Constitucion y ta hopi peligroso pa estado di derecho.” Lopez Tromp, kende tambe a fungi como Presidente di Parlamento a sigui bisa cu “Covid no por ta motibo pa trapa Constitucion y keda maluza pa baha un Minister di e pais sin cu tin quorum. Un Minister ta nombra segun un landsbesluit y e ta traha pa Aruba.”

Lopez Tromp ta lamenta cu ta uza e reunion publico riba Spearfishing, y e piscadonan cu mester di ayudo, pa crea e impresion cu e no ta di acuerdo pa duna un yudansa.

Bon Dia Aruba a puntra Minister Lopez Tromp di con e ta sigui como Minister, mirando cu e ta obvio cu su propio fraccion y particularmente fraccion di MEP no kier e. Su contesta tabata corto y sin mucho splicacion. “Bon pregunta.”