Hunta di Directiva di Serlimar tabatin tur derecho pa retira Henley Davelaar como Director. Y e motibo principal ta cu no a logra maneha e Serlimar debidamente, ni pa saca e facturanan na tempo pa asina por cobra y haya e fondonan necesario. Esey tabata e opinion di Huez mr. Van de Leur den su sentencia ayera.

Manera ta conoci, Davelaar a entama un caso contra su retiro, argumentando cu su contracto ta pa 5 aña y si kier kibra esaki, Serlimar lo mester pag’e e resto di e lunanan cu a keda di su contrato. Davelaar tabata cobra Afl 15.042, 50 mensualmente, mas un toelage di cas pa Afl 2500,00 y cu Afl 607,50 pa cubri diferente otro gasto. A cera su contrato dia 23 di October 2018 y apenas cu Marisol Lopez Tromp a tuma encargo di Serlimar, hunta di Directiva a dicidi pa retira e ex Director.

E tarea specifico di Davelaar tabata pa maneha e gastonan di Serlimar, percura saca e cobranzanan. Pero Hunta di Directiva a constata cu Sr. Davelaar no tabata hiba e maneho cu a spera di dje, y cu ademas di no tabata hiba un maneho pa baha gasto, no tabata ni saca e facturanan na tempo ni a presenta un plan di negoshi pa Serlimar, pa no papia di e relato financiero cu mester a produci semanalmente cu nunca a sosode. E motibo di su retiro, segun e argumentonan presenta den Corte, ta cu a ripara cu Sr. Davelaar no tin e capacidad pa maneha Serlimar, y cu mirando e situacion financiero dificil, mester busca otro persona.

Huez a bay de acuerdo cu e argumento aki, y a bisa cu e contract cu Serlimar tabata brinda espacio pa a retira Davelaar pa e motibonan aki. Como tal, huez a rechasa e ponencia cu mester pag’e e resto di e contract na un balor total di Afl 780.540,00. Ademas Davelaar mester core cu gasto di Corte na un balor di Afl 8000,00.

Razon pa maneho Marisol Lopez Tromp

Pa Ex Minister Marisol Lopez Tromp, e sentencia ayera no tabata un sorpresa. Ta otro caso cu e ta sinti cu ta ilustra cu e maneho cu el a hiba ora cu el a tuma e cartera di Minister di Ordenanza Teritorial, Infrastructura y Medio Ambiente (ROIM) tabata esun debido. Es mas, ora cu el a tuma encargo di Serlimar, el a mira mesora cu e situacion tabata for di control y a conseha Hunta di Directiva pa tuma paso. Y un di e prome pasonan tabata pa retira Davelaar y busca otro Director.

Pero e decision aki no a cay den bon tera cerca su partido e tempo ey, POR, sigur no ora cu el a kita diferente persona for di e despacho di Minister ROIM, cu no tabata presenta na trabou, un cu no tabata ni biba na Aruba. Un di e personanan cu Lopez Tromp a cataloga como spirito, esta Gilberto Thiel tambe a bay Corte pa bringa su retiro, y a perde e caso.

“Awor casi un aña despues cu a retira e ex Director di Serlimar, Huez ta acepta cu tin suficiente motibo pa e retiro, esta cu e no a cumpli cu su tarea specifico. Esey ta los di e otro argumentonan valido,” segun Lopez Tromp, “manera diploma ficticio, proceduranan cu no tabata cana bon, unda tabata permiti otro participa den decisionnan.” Marisol Lopez Tromp a bisa cu banda di e ex-Minister e tempo di Davelaar, tabatin diferente mini-Minister tabata mete den e decisionnan di Serlimar, cu a pone Serlimar bay mas atras.

Locual ta dificil pa Marisol Lopez Tromp compronde ta con Parlamento di Aruba no por a dun’e e apoyo necesario despues di a haci un trabou pa pone tur cos riba un liña. No solamente na Serlimar, sino e pasonan cu el a tuma pa retira hendenan cu tabata cobra sin haci nada. Ademas, cada caso cu a entama contra e maneho cu el a hiba den e poco tempo como Minister a sali na su fabor, cu ta mustra cu su decisionnan tabata hustifica.

Medio Ambiente y e ‘free for all’

Un di e tareanan di ex Minister Marisol Lopez Tromp tabata pa mantene e leynan di naturalesa. Como tal, e mester a wanta hopi critica denter di Gobierno y e partidonan di coalicion cu el a para tras di decision Fundacion Parke Aruba pa controla e cantidad di UTV den Parke Nacional Arikok. Tambe el a haya masha hopi critica cu e no tabata kier a permiti un gedoogbeleid sin mas pa tiramento di pisca cu ta prohibi pa ley, sin cu tin e controlnan debido. Awor ta resulta cu su advertencia den Parlamento tabata na su lugar, pasobra hunto cu e gedoogbeleid a bin un “free for all,” unda ningun hende ta preocupa cu mantencion di ley.

Den otro palabra, un Gobierno bou maneho di Prome Minister Evelyn Wever Croes y un coalicion cu a priminti integridad y bon gobernacion a rechasa tur su intentonan pa haci su trabou debidamente y comunidad ta mira e resultadonan awor. Es mas, Marisol Lopez Tromp ta puntra kico Prome Minister Wever Croes mes ta pensa riba kico a sosode, pasobra a pesar di a acus’e di ta fastioso, dificil of di a stroba procesonan pa economia por cana pa motibo di control na DIP, “mi no a mira mucho cos. Ainda tin huma ta bolter na dump, ainda hende ta keha di no a haya tereno pa planta.”

Tolerancia pa corupcion

E ex Minister a sigui splica cu p’e tabata hopi cla for di principio cu Prome Minister Evelyn Wever Croes no tabata interesa den medio ambiente particularmente. Particularmente ora cu otro Ministernan tabata mete den asunto cu ta cay bou di e cartera di Medio Ambiente. Al contrario, Evelyn Wever Croes tabata parce di a scoge pa tene su Gobierno hunto en bes di percura cu tin bon gobernacion y cu Ministernan ta actua segun ley. “Basta cu por sigui. Y esey a bira cla pa mi, dia cu nan a saca mi di Conseho di Minister. E tempo ey tabatin mas problema cu Minister Lampe, unda practicamente a tuma parti di su cartera. Pero mester a wanta e coalicion y pa esey tabatin mester di RED.”

Marisol Lopez Tromp a comenta cu na October 2020, el a bisa Parlamento cu no ta importante cu ta mand’e cas. “Pero si cu mi a atende casonan di corupcion y cu mester combati esakinan. Y mi no a haya e apoyo. Prome Minister mas bien mustra di ta tolerante pa corupcion.”