Marisol Lopez Tromp: “Solangel Dinmohamed-Lacle a tuma un actitud di postura y palabranan cu pa nos no ta aceptabel”

Door di e conferencia di prensa di Solangel Dinmohamed-Lacle na unda el a trece dilanti su situacion politico cu partido MAS specificamente cu e lider Marisol Lopez Tromp y Aquannette Gun, Bon Dia Aruba a tuma contacto cu Lopez Tromp pa asina duna su banda di e medaya.

Aunke Bon Dia Aruba no a haya un declaracion exclusivo for di Lopez Tromp sino un audio di un noticiero di otro medio di comunicacion na unda e si a contesta tocante e caso aki, el a trece dilanti cu Dinmohamed-Lacle for di algun tempo caba e no ta forma parti mas di e partido aki.

El a indica cu e ta haya straño cu ayera el a trece esaki dilanti pa motibo cu for di basta dia caba Dinmohamed-Lacle a wordo atendi riba cierto comportacion cu no tabata ni di awo, ni despues di eleccion, sino prome cu esey caba na unda directiva a atende cune.

“E problema nunca tabata e protocol, protocol ta algo cu por cierto tur a kere aden pasobra e ta un forma husto di berdad pa esnan cu mas voto drenta parlamento”, el a comenta.

Den e caso aki, Lopez Tromp a sigura cu henter miembronan di partido y directiva a pidi pa retira e persona aki y e motibo ta conoci, segun el a menciona, “nos a reuni riba e topico aki mas cu un biaha y atende e topico aki cune y despues di eleccion y mi por bisa tambe ora cu e miembronan a pidi na directiva na unda tur a manda aden kico a pasa cu nan, di kico el a haci cu nan, den e caso aki a pidi pa bin un reunion cu bestuur pero e no a atende ningun di e reunionnan cu el a invita p’e”, Lopez Tromp a declara.

El a laga sa cu partido MAS no tin problema pa loke ta trata e protocol ni tampoco entre su miembronan, loke a surgi ta cu Dinmohamed-Lacle “a tuma un actitud di postura y palabranan cu pa nos no ta algo aceptabel”, el a manifesta.

Partido a atende e comportacion di e parti politico pero tambe e hecho cu segun Lopez Tromp a bisa “no por ta asina cu bo ta forma parti di un ekipo y na momento cu resultado di eleccion a bira conoci, tur hende sa cu Aruba a drenta den un proceso caminda cu lo wak ken ta forma cu ken, un periodo di informacion despues awor un periodo di formacion, pero tabatin un persona cu ta haya su posicion mas importante cu full e proceso aki”, el a comenta.

Pa finalisa el a bisa cu nan ta cumpli cu e kiesverordening manera Conseho Electoral ta dicta y p’esey tur e prome riba lista ta esun cu ta drenta parlamento.