Lider di fraccion POR, Marisol Lopez Tromp a elabora riba e reunion publico riba e ley Serlimar, pero a enfoca riba un punto specifico cual e ta considera di sumo importancia. Ta trata aki e rapport di PAHO (Pan American Health Organization) di maart 2018 tocante e situacion di e dump di Parkietenbos.
El a indica cu el a duna atencion na e punto aki durante su disertacion di primera tanda, pero e ta considera cu e topico aki mester di atencion nacional. A indica cu hopi punto di e reunion publico tabata enfoca riba e parti economico, di ken ta bay haci tal parti, di ki proyecto, hasta un sorto di polarisacion di grupo contra grupo, etc. Naturalmente e no ta desea di perhudica ningun grupo, pero, e esencia p’e y specialmente como e presidente di e comision di salud den Parlamento, ta e pakico e dump aki mester wordo cera ‘no awe, sino ayera’.
E rapport di PAHO preto riba blanco ta pone den basta detaye, tur e situacion actual pa cu e dump di Parkietenbos y ta enfoca riba e parti medio ambiental, e parti toxico, e parti venenoso, e parti contagioso pa loke ta tera, aire y lama y con esaki ta afecta e bida y salud di nos hendenan cu ta biba den cercania y di esunnan cu ta traha den cercania. “E situacion aki no por sigui asina mas”. Documentonan ta mustra cu tur e residuonan peligroso cu tin, e parti toxico y venenoso cu tin na cantidad riba e dump den forma habri, incluyendo material di hospital por causa varios enfermedad cu por wordo transmiti na nos hendenan den diferente forma. “Nos como hende ta vulnerabel na diferente microbio, ta vulnerabel pa pega cu cualkier malesa, sea a traves di aire, mishi cu algo of animalnan cu ta bin rond y ta yega den cercania di nos”, Lopez-Tromp a indica.
Ademas, e ta indica cu tin tambe e parti di cosnan cu ta drenta lama y cu e parti di lama den e area ey ta asina contamina cu practicamente no tin bida eynan mas.
Tambe el a menciona e parti di bestianan cu ta wordo considera como plaga manera djaca, musca, cacalaca y otronan cu por tin efecto riba nos salud y por wordo contagia di un persona pa otro. Ehempel di malesanan cu por wordo transmiti por medio di cierto animalnan ta: Malaria, Chincungunya y Zika, solamente pa menciona algun.
No por keda sin menciona e diferente enfermedadnan cronico cu nos hendenan cu ta biba of traha den e area ta hayando, manera asma, malesanan di cuero y hasta cancer. Habitantenan di Parkietenbos ora a acudi na Parlamento pa reunion, nan a bisa e parlamentarionan cu nan no por sigui asina mas, cu e dump tin cu cera.
Lopez-Tromp mirando tur e puntonan aki ta pone enfasis cu e enfoke di e reunion publico mester ta riba salud, cual ten a e momentonan aki no a haya e atencion debido. “Esencia di e discusion mester ta bida di hende, esey mester bin na prome luga, sin salud bo no tin bida y bo no lo bay tin calidad di bida si e situacion keda manera cu e ta aworaki”.
