Ayera e matrimonio politico cu e mandatario, Marisol Lopez-Tromp a mantene cu partido POR pa tres aña largo, a conoce un divorcio sorpresivo p’e.
Unabes cu e minister a sali for di un reunion di tres ora cu Gobernador di Aruba, el a duna algun comentario riba e decision cu e lider nobo di POR, Andin Bikker, a haci pa e mandatario entrega su cartera mas tarda dialuna 10:30 di mainta.
Ainda e no a dicidi si lo entrega su cartera dialuna, manera lider nobo di POR a exigi for di dje. Tampoco el a bisa cu no a ricibi un carta oficial di e partido exigiendo su renuncia y entrega di su cartera como minister. Lopez-Tromp ta pendiente di e proximo desaroyo, el a priminti cu lo bini cu un conferencia, unda e lo aborda diferente topiconan relaciona cu e motibonan cu e lider di POR a trece dilanti pa pidi su renuncia.
Mesora cu e decision di POR a cay, prensa tabata pendiente pa busca e version di minister Lopez-Tromp den henter asunto aki. Na e momento ey e mandatario tabata atendiendo un reunion di Conseho di Minister. Prensa a puntr’e riba e respaldo cu nan coleganan a yega di expresa, pero el a abstene di duna informacion riba e contenido di e reunion aki.
Durante Lopez-Tromp su recorido for di bestuurskantoor pa gabinete di Gobernador, el a bisa brevemente: “Mi ta un minister valido.” Ademas el a wordo nombra a base di ley, y cu e ta sirbiendo como mandatario na interes di pais.
El a bisa cu e decision di partido POR tabata un sorpresa p’e. “Mi ta sumamente sorprendi y tambe babuca pa e cosnan cu a wordo treci pa dilanti riba mi persona,”” el a bisa. Pero particularmente pa e motibonan duna pa Bikker pa e retir’e como minister. Un di nan tin di haci cu e prohibicion di entrada di ATV y UTV pa Parke Arikok. Y otro riba maneho na Serlimar. El a bisa cu Parke Arikok mes ta dicidi ken ta drenta, ken por sali y e maneho cu tin. Mientras cu Serlimar ta un compania Sui Generis cu nan ta trahando pa rescata.
Durante un conferencia di prensa improvisa dilanti di gabinete di gobernador, e mandatario a bisa prensa cu diahuebs ultimo el a bay atende un invitacion di Parlamento, unda el a contesta preguntanan y caminda el a duna un splicacion tambe, hunto cu directiva di Serlimar, tocante e parti financiero di e empresa aki. Den e reunion interno den parlamento tocante Serlimar, el a duna loke ‘mi mester duna’ na un di e organonan mas halto di nos pais. E tabata un reunion na porta cera, unda el a duna informacion interno di e compania.
Lopez-Tromp a laga sa cu e no ta reconoce e motibonan di e acusacion cu a wordo treci riba su persona. Muy particularmente riba fecha di ayera, conoci como Dia Internacional di Medio Ambiente. Den cuadro di esaki, un di argumento duna pa e lider di POR pa Lopez-Tromp entrega su cartera, tin di haci cu e compania en cuestion y su board ta esunnan cu ta dicidi. El a splica cu Serlimar ta un Sui Generis, y no un departamento, caminda como minister e ta dicidi ken ta pone y ken ta kita. Ta e directiva di e compania esun cu ta dicidi pa susseance van betaling
E mandatario a declara cu tur hende sa cu el a hereda un situacion caminda e compania estatal aki ta tecnicamente failliet. El argumenta cu como minister, e ta luchando tur dia pa trata di rescat’e. Mientras –segun e mandatario– e ta bin wak cu esaki ta un di e motibonan pa lider di POR bisa cu e mester baha como minister.
Tampoco e no ta kere cu ta un motibo valido pa e baha como minister, ya cu e ta un ‘persona no comunicabel’. E ta haya cu tal argumento no ta corecto, ya cu e tin contacto cu hopi hende, uzando diferente forma di comunicacion. El a reitera cu e argumentonan cu a wordo treci pa dilanti, pa renuncia como minister, no tin base.
El a bisa cu como minister esun cu e mester duna cuenta ta parlamento di Aruba na prome luga. Actualmente e ta minister y parlamento ta e organo mas halto di nos pais. Parlamento ta esun pa medio di un mocion di desconfiansa ta dicidi riba su posicion. Pero tambe riba maneho di gobierno. Lopez-Tromp ta sinti cu tur e tempo cu a pasa, loke e ta bin ehecuta ta e responsabilidad y metanan cu gabinete Wever-Croes a stipula pa den su caso e ta ehecuta como minister di Infrastructura, Planificacion y Medio Ambiente.
