Ta duna drs. Marisol Lopez Tromp e tempo pa bolbe Aruba pa asina por defende su mes den Parlamento. Asina Presidente di Parlamento Ady Thijsen a bisa Bon Dia Aruba.

Diabierna awor, Parlamento di Aruba lo tene un reunion publico yama pa Parlamentarionan di POR, Dellanire Maduro y Alan Howell pa entrega nan mocion di desconfianza contra e Minister di POR, Lopez Tromp.

Maduro y Howell a haci e peticion pa entrega mocion di desconfianza contra Minister di Ordenanza Teritorial, Infrastructura y Medio Ambiente. Peticion tabata firma pa lider di fraccion di MEP Rocco Tjon y Ricardo Croes, di fraccion di RED.

E base di e peticion ta e impasse cu tin den e partido politico, e partido di coalicion, POR. E conflicto entre e partido POR y e Minister, cu te ainda ta miembro di e mesun partido, a sigui hasta despues di e proceso di mediacion.

Lider di POR, Minister di Husticia mr. Andin Bikker a informa Conseho di Minister cu e lo no atende ningun reunion, tanten cu drs. Marisol Lopez Tromp ta Minister. Esaki a conduci na un situacion cu ta dificil pa funciona den Conseho di Minister. Den luz di e crisis di Covid, Gobierno no por permiti conflicto na e momentonan aki.

Esey ta motibo tambe cu a urgi Presidente di Parlamento pa yama e reunion a corto plazo. Mirando e vakantie planifica di drs. Lopez Tromp di 26 di Juli 2020, a pidi Presidente di Parlamento pa yama e reunion mas lihe posibel.

Dialuna ultimo a yama e reunion pa diabierna awor, 31 di Juli, pa 8’or di mainta.

Di otro banda, Secretaria di Conseho di Minister mr. Grace Koolman a informa Parlamento cu Minister Marisol Lopez Tromp ta ausente y no ta riba e isla, for di 26 di juli te cu 10 di augustus.

Presidente di Parlamento Thijsen a ilustra cu Aruba ta den un crisis grandi na e momentonan aki, y no por permiti un interupcion asina aki. Aruba mester yega na un resolucion cu Hulanda na augustus cu Hulanda riba e sosten di likides, y e problema interno di POR no por stroba e funcionamento di Gobierno na e momentonan aki.

Mr. Thijsen ta compronde cu drs. Marisol Lopez Tromp ta cu vakantie, pero cu ta e Minister mes a declara Diasabra ultimo cu ta Parlamento so por dicidi riba su funcion. Y esey ta bay ta e caso aki. A yama e reunion pa Diabierna pa duna e Minister e oportunidad pa bolbe. “Cualkier doño di trabou tin e derecho pa yama su trahado pa bolbe di vakantie, den caso di un crisis. Esaki no ta diferente. Y mi a duna Minister Lopez Tromp suficiente tempo pa bolbe Aruba.”

Thijsen ta enfatisa cu tin hopi diferente interpretacion di e LIM, esta e Landsbesluit Instelling Ministers, y cu no necesariamente, lo mester a bay Parlamento pa e Minister por a entrega su funccion. Es mas, hasta na Hulanda tin precedencia, tempo cu miembronan di PvdA a perde confianza den nan mesun Minister.

E Presidente di Parlamento ta enfatisa cu e discusion ta uno di partido POR, pero e conflicto no por stroba e funcionamento di pais Aruba. “Y na e momentonan aki, interes di Pais Aruba ta bay riba interes partidario y interes personal,” Thijsen a bisa.

Bon Dia Aruba a tuma contacto cu Minister Marisol Lopez Tromp kende a keda sorprendi pa e decision di Presidente Ady Thijsen pa a yama e reunion pa Diabierna awor. Particularmente pasobra mr. Thijsen tabata informa di e importancia di e biahe di drs. Lopez Tromp pa acompaña su yiu. “Nos a come hunto y sr. Thijsen tabata consciente cu mi mester a bay cu mi yiu,” un Marisol Lopez Tromp sorprendi a bisa.
Drs. Lopez Tromp a bisa cu e ta bay considera awor ki ta su opcionnan.

Reunion ‘hamerstuk’

E reunion pa baha Minister Marisol Lopez Tromp ta parce di no ta uno pa hiba debate. Es mas, den e yamada, firma entre otro pa Ricardo Croes, kende a declara na Bon Dia Aruba, di no sa kico e Minister a haci fout, ta mustra cu ta djis un reunion pa tuma un decision.

E asina yama ‘oproep’ tin un solo tema, cu ta e mocion di desconfianza. Pero, no tin indicacion cu ta bay tin discusion. Es mas, a compronde cu mas bien e ta bay ta un asina yama ‘hamerstuk’ cu ta nifica cu ta djis pa vota mesora sin debati.

Den otro palabra, e intencion ta pa vota sin un debate, cu ta nifica cu comunidad lo no haya sa e motibo pakico POR formalmente kier pa su Minister bay.

Si ningun hende inscribi pa hiba palabra, lo no tin debate.

E pregunta ta sinembargo si Gobernador lo firma e decision pa kita drs Marisol Lopez Tromp, sin cu bin e transparencia cu te hasta RED a expresa di ta importante. Ademas, tanten cu Gobernador no firma, drs Lopez Tromp lp keda oficialmente un Minister.  Su nombramento a sosode dilanti Gobernador, como representante di Su Mahestad Rey Willem-Alexander.

Test di Covid-19
 Mirando cu Parlamento a solicita presencia di Lopez Tromp pa 8am diabierna, ta surgi e pregunta si e lo haya chens pa cumpli cu e rekisito di un test di Covid-19. Ya cu el a haya e peticion ayera nochi, ta diahuebs e por bula bin bek Aruba. Teniendo esaki na cuenta, e no lo mester warda resultado di su test prome cu ta den contacto cu otro hende na Parlamento? Esaki ta mustra e falta di claridad tocante e protocol pa test di Covid-19 pa personanan biniendo di Hulanda.