Marisol como e ‘Messi’ di Aruba?

Campaña electoral 2017 a cuminsa, esey nos por bisa sigur. Ya caba nos ta hayando e prome casonan di discordia o disputa, speculacion tocante tal o cual persona cu si of no lo ta join partido X, etc. Nos tin e caso di conflicto entre lider di partido Andin Bikker y e number dos riba lista di eleccion 2013, cu a hala basta atencion di prensa pero no ta parce asina relevante pa e curso general di campaña. E caso Marisol Tromp tambe ta duna colorido tempran den campaña caba. Si ta berdad cu a ‘set up’ su persona bebiendo koffie cu e dos lidernan di e combinacion POR-PDR, pa asina pone presion pa acepta e oferta di join e iniciativa politico, anto nos ta kere cu nan no a cuminsa riba bon pia. E nunca tabata e tipo di politico cu por uza como bala di futbol; e kier ta den e wega como hungado. E impresion ta cu esey a bay robes aki. Lo tabata hopi mas sensato pa hiba e deliberacionnan den extremo discrecion y despues sali cu un anuncio conhunto cu tin un acuerdo.

E manera cu a maneha e asunto ta duna talbes di conoce kico e por spera despues, ora cu e ta a bordo caba: un lider cu ta pone dilanti un ‘fait accompli’? Asina e mester bay cuminsa su carera den un partido nobo, unda prome cu e subi e boto ya nan a cont’e cuant’or tin? Pa un politico cu semper a distingui su mes pa caracter fuerte ta dificil pa acepta un trato asina. Si e acepta a pesar di e incidente, lo ta pasobra a coregi e asunto aki. Di otro banda tambe a bin oferta, treci den luz publico sin mas, y esey ta di e partido grandi den oposicion. Aki abiertamente a admiti cu tabatin e deseo di por lo menos un parti di e partido pa sondea e posibilidad pa e parlamentario independiente reuni cu e partido di cual el a sali, o cu a pone pafo tanto aña pasa. Esaki ta mustra algo masha dificil pa realisa. Aki ta trata di un punto di principio, cu dificilmente por cambia. Tempo di e salida di e dos parlamentarionan esey a sucede a base di nan decision di vota na fabor di un proposicion di ley di gobierno, a base di nan derecho/deber di vota segun nan consenshi. En general, bo por cuestiona y discuti e punto di bista cu e persona ta defende, pero cuestiona un voto di consenshi ta bira bastante dificil.

Den e caso – teorico – cu un persona asina bolbe den e partido di cual el a sali a base di un conflicto asina, ken lo  ‘baha cabes’ ? Ken lo mester a cambia di idea pa por traha hunto? Sea e politico en cuestion ta drenta atrobe a base di aceptacion di somete su mes totalmente na disciplina di partido, o ta e partido ta cambia di opinion y ta habri e posibilidad cu su representantenan den parlamento por diferi di opinion y por vota contrario a base di nan consenshi? Esakinan ta pregunta bastante dificil di contesta, hopi mas dificil cu e simpel anuncio cu ta trata di gana e politico aki atrobe den seno di partido. Pero e caso Marisol, si nos por yam’e asina, tin mas aspecto interesante. Esunnan cu a mira su actuacion por cierto na nos opinion impresionante den parlamento den tratamento di e ley pa aproba reapertura di e refineria, unda como unico el a representa e opinion di hopi ciudadano cu lo a prefera di mira e refineria desmantela y cu Aruba lo a busca un otro destino pa San Nicolas y pa Aruba den su totalidad. E pregunta grandi ta con pa ‘suavisa’ e punto aki, si PDR y Otmar Oduber como exponente di e partido den gobierno tabata di acuerdo cu e reapertura di e refineria, cu practicamente a condena San Nicolas pa sigui biba den contaminacion di un instalacion petrolero, sea refineria o upgrader, pa e proximo decadanan.

O por ta cu ta p’esey di banda di POR a cuminsa critica e asunto di e refineria, cu ta mustra en berdad cu por lo pronto lo no tin tanto avance, ya cu un bon parti di e aña aki lo bay na preparacion di e plannan tecnico pa por ehecuta e rehabilitacion. Y banda di esey, mester warda ainda pa mira si e companianan contratista cu a keda encarga cu busca financiamento, lo logra esey tambe. No mester lubida cu e proyecto aki ta siguiendo e mesun modelo novedoso di PDVSA pa invita e contratista pa bay fia placa pa ehecuta e obra, manera a trata di haci recientemente na Venezuela mes tambe. Esaki primordialmente pasobra e empresa madre, ni e yiu principal na Merca, no por fia placa mas.

E contesta cu e mandatarionan envolvi a keda debe nos ta con ta para cu e financiamento cu e contratistanan mester a bay busca. Den e lunanan venidero e refineria y Marisol, como e ‘Messi cu oferta di China’, por bira clave den e campaña electoral.