Pa Bono-Vox Hassell, participante di grupo 9 di Formacion Social ta un soño cu a bira realidad ora cu el a haya sa cu e team di Sociale Vormingstraject a logra haya un lugar p’e core stage den garashi di Marinierskazerne. Bono-Vox ta sinti su mes hopi orguyoso di loke el a logra te awor cu su participacion den e programa di Formacion Social. “Mi tin un diploma caba di Prome Auxilio di Cruz Cora y mi tin un certificado di “Anger Management” cu tambe ta importante ora cu bo ta busca trabou,” e hoben a comenta. Ora cu el a yega e momento pa core stage, el a pidi pa busca algo cu tin di haber cu mecanico y “preferiblemente na Marinierskazerne mes”, el a bisa su mentornan. Nan a logra haci su soño realidad. “Traha riba auto ta algo cu semper mi a gusta y awor SVT ta yudami den esaki.” E hoben a conta cu el a cuminsa traha den garashi unda cu el a siña inicialmente traha riba motor di autonan diesel, pero tambe a siñ'e di autonan cu ta core riba gasoline. Awor el a haya e tarea pa hunto cu e hoben di Arumil Juan Martijn pa torno un motor y despues arma esaki bek pa e wordo poni den e vehiculo y wak si e ta traha. Bono-Vox Hassell tabatin palabra di elogio so pa tur loke e programa di SVT a haci p’e. Pesey e no ta duda pa conseha e hobennan cu no a logra un diploma, pa inscribi lihe pa e proximo programa cu ta cuminsa na januari awor. Formacion Social ta un programa iniciativa di Prome Minister Mike Eman unda hobennan entre 18 pa 24 aña cu no a logra termina scol of no tin ningun diploma por sigui e programa. Inicialmente e programa aki a wordo financia door di Aruba hunto cu Ministerio di Defensa di Hulanda y awor e ta cai completamente bou responsabilidad di Gobierno di Aruba mientras cu Marinierskazerne ta coopera poniendo e ekipo y personal disponibel pa e cursonan.
