Un marinier Mericano den servicio activo, kende su submarino tabata staciona na Pearl Harbor a cuminsa tira riba tres empleado civil. El a mata dos y despues el a kita su mesun bida, algun dia prome cu dignatarionan y veteranonan yega na e base pa conmemora e 78 aniversario di e atake Hapones.
Comandante di marina di region di Hawaii, Robert Chadwick a bisa cu no sa e motibo pa e atake na e base naval na Hawaii, cu a laga e di tres empleado civil di Departamento di Defensa herida. Tampoco sa si e marinier y e tres homber tabatin un sorto di relacion.
E marinier tabata asigna na e submarino di atake rapido, di USS Columbia, cu ta na e ‘shipyard’ na base Pearl Harbor-Hickman pa mantencion. No a duna detaye di e marinier, tampoco no sa cua arma el a uza ni cuanto bala el a tira. Chadwick a bisa cu esey ta parti di e investigacion.
No ta permiti arma personal na e base. No lo revela nomber di e victimanan te ora cu a notifica e famia.
“Nos pensamento ta bay na famia di victima y tur esunnan involucra. Nos ta dunando servicio di sosten pa e personal di e base naval y pa tur esunnan afecta pa evento tragico aki”, Chadwick a bisa.
Gobernador di Hawaii, David Ige, a bisa cu Cas Blanco a ofrece asistencia di agencia federal y cu e estado tambe ta cla pa yuda. “Mi ta uni den solidaridad cu pueblo di Hawaii mientras nos ta expresa nos angustia pa e tragedia y preocupacion pa esunnan afecta pa e tiramento”, Ige a bisa den un comunicado.
E ‘shipyard’ ta na otro banda di e haf di monumento nacional Pearl Harbor. Diasabra lo marca e di 78 aniversario di e bom Hapones cu a ataca Merca den Segundo Guera Mundial. Mas di 2.300 Mericano a muri den e atake di 7 di december di 1941.
