Marina Real ta intercepta den 4 dia mas cu un ton di cocaina den Region Caribe

Zr.Ms. Groningen riba dianan  24 y 28 di april ultimo a intercepta 2 transporte di droga den Region Caribe.

Ambos Go-fast a keda descubri pa un avion di patruya Mericano, despues di cua Zr.Ms. Groningen a drenta den accion.  Zr.Ms. Groningen a pone curso pa bay na e go-fastnan y despues a lansa su botonan di intercepcion rapido  cu tabatin a bordo Scuadron di  Flota di Marina  (Fleet Marine Squadron) y Destacamento di Aplicacion di Lei (LEDET) di Wardacosta Mericano, segun un comunicado di prensa di Marina Hulandes den Caribe.

Durante e prome accion e sospechosonan no a entrega nan mes facilmente.  Esey a sucede despues cu a dispara tironan di advertencia.  Durante e di dos accion, esey no tabata necesario.  E cuater sospechoso y e total di 1072 kilo di cocaina a keda entrega na Wardacosta Mericano. Entretanto e droga a keda destrui y e sospechosonan lo keda persigui na Merca.

Zr.Ms Groningen for di april 2024 ta activo atrobe den Region Caribe. E Barco di Marina Hulandes  entre otro ta keda desplega pa operacionnan anti-droga den cooperacion diversifica cu Wardacosta di Merca y Wardacosta Region Caribe Hulandes.