Mariluz Montilla ta un hoben cu a biba na Aruba y recientemente a muda pa Spaña pa continua cu su estudio y den buskeda di un miho futuro. Den un entrevista e ta conta nos di dje, di su experiencia na Spaña y su metanan.
Ken ta Mariluz Montilla?
Mi ta naci na Aruba di tata Venezolano y mama Colombiano. Pa motibo di cosnan di bida mi a bay biba Colombia cu mi ruman tempo nos tabata chikito pasobra mi mama a dicidi di bay Colombia back y a hiba nos cune. Despues di algun tempo mi mama a dicidi di bay Spaña y nos a keda na Colombia cu famia. Pero despues di algun aña mi wela di parti di tata cu ta biba na Aruba ainda a bin Colombia busca ami y mi ruman y hiba nos back Aruba unda el a cria nos, hunto cu mi tata.
Con bo criansa tabata na Aruba?
Mi a crece den un ambiente normal. Mi tabata pasa hopi tempo cu mi wela, e tabata hiba y trece nos tur caminda cu nos mester a bay. Mi a bay Scol Basico Kudawecha. Na principio mi tabatin un poco dificultad cu e idioma, pero poco poco el a mehora. Despues mi a pasa pa Ceque College mavo y ora mi a caba mavo mi a bay Colegio Arubano. Aña pasa mi a gradua di Colegio Arubano y mi tabata sa cu mi kier a sigui studia afo, pero mi no tabata sigur na unda. Prome mi a pensa Hulanda, pero despues mi a pens’e miho y ya cu mi mama ta bibando na Spaña ainda, mi a dicidi di bin Spaña y continua cu mi estudio akinan.
Con bo experiencia na Spaña ta te aworaki? Kico ta locual a impacta bo mas den e diferencia di cultura?
Te aworaki mi experiencia ta hopi bon. Mi ta bibando na un pueblo cu yama La Pobla de Valbona cu ta keda cerca di Valencia. Prome cos cu mi a ripara ora mi a yega ta cu e ta hopi mas barata cu na Aruba. Na Aruba costo di bida ta halto, aki e diferencia ta basta grandi. Tambe algo diferente ta e clima. Na Aruba mi a custuma cu semper ta calor, pero akinan ora winter a yega, tabata hopi friu y ta tuma tempo pa custuma cu esey.
E ta un pais hopi grandi obviamente, pero unda ami ta bibando algo cu a sorprende mi un poco ta cu no hopi hende ta papia Ingles. Locual ta un bentaha pa mi, ya cu mi por papia cuater idioma y esey ta habri mas porta pa mi. Tin hopi oportunidad pa nos hobennan akinan tanto di estudio como di trabao. Tin hopi mas posibilidad. Y di locual mi mes por investiga, e ta mas facil, compara cu Aruba, pa lanta bo mesun negoshi y bay dilanti. E hendenan tin un mente hopi mas habri tambe.
Ki estudio bo a scoge pa sigui?
Mi a scoge pa studia International Business cu dobel titulo, dus mi ta gradua akinan y mi titulo por wordo reconoci na Merca tambe. Mi a bay den e direccion ey pasobra mi kier tin mi mesun negoshi un dia, y cu asina hopi oportunidad y posibilidad akinan mi ta contento cu mi escogencia.
E guera entre Rusia y Ucrania, bo ta sinti cu esaki ta afectando e pais?
Si el a cuminsa tin su efectonan. Gasolin por ehempel a subi hopi pasobra nan no ta cumpra gasolin ni gas for di Rusia. Tin hopi hende di Ucrania ‘kinan tambe, kiermen bo ta scucha nan y wak noticia tambe y e guera ta sinti basta cerca toch. Pero mi ta spera cu e guera por caba pronto sin cu e mester escala y bira un guera mas grandi.
