Ya e di seis luna di aña ta concluyendo y e indice pa loke ta e vector di e sangura cu ta transmiti Dengue, Chikungunya y Zika, ta hopi abao. Esaki ta segun hefe di e Departamento di Epidemiologia di Salubridad Publico, Maribel Tromp y el a agrega cu Aruba por ta basta trankil te cu awor aki.
Un otro motibo pakico nos mester hala rosea di alivio, ta cu desde januari te cu awor aki, tempo tabata basta seco te cu fin di siman cu a pasa, caminda cu awa a cuminsa yobe atrobe.
Cu e temporada seco tras di lomba, a preveni cu hopi criadero a wordo forma di e sangura Aedis Aegypti. Sinembargo, por a nota den prensa cu un team special a wordo forma entre GKMB, DOW y Serlimar entre otro, pa asina fumiga tur bario na Aruba, den cuadro cu e virus di Zika, cual nos tin cu bisa a bira algo endemico den masha hopi pais rond mundo, en particular den nos region di Caribe y tambe Latino America.
Casonan crusa
Di januari te cu awo ta ocupa ta monitor e situacion di e cantidad di casonan cu ta wordo anuncia pa dokternan di cas, caminda cu tabata tin 773 caso sospechoso, pa dengue, Chikungunya y Zika, for di cual 49 a wordo confirma como dengue, 5 como Chikungunya y 21 como Zika. E confirmacion aki ta via laboratorio, segun Tromp.
Loke ta particular sinembargo ta cu tin cu tene na cuenta cu e test di serologia cu un laboratorio ta uza pa detecta e virusnan aki, tin un reaccion cu ta crusa cu otro. Tin un sospecho grandi cu e cantidad di casonan di dengue, por ta no ta dengue. Kisas lo mester ta casonan di Zika, pero no tin testnan cu ta bisa cu esaki ta e caso. Pero ta wak
si cu e sintoma ta concentra riba e casonan cu a wordo notifica, un kwart tabata mustra manera Zika. 18% tabata mustra como dengue y 16% como Chikungunya. Esey ta duna mas indicacion cu Zika ta circulando, aunke e otro dos nan ta circula igual riba nos sla.
Sintomanan comun
E sintomanan mas comun cu a presenta nan mes ta e sintomanan di kentura, dolor di cabes y dolor di curpa. E personanan mas afecta den notificacion aki di tur tres malesa ta entre 45 y 64 aña, sigui pa e edad tiki mas hoben. Den e concentracion esaki ta mas halto. Compara cu e aña anterior, tin menos caso di notificacion. Aña pasa den e temponan aki esaki a yega te casi 1000 caso, esey ta consistiendo di dengue y Chikungunya.
Awa lo bay yobe
Nos por ta basta trankil te cu awor aki, pero no mester lubida cu ta pronostica cu awa lo bay yobe den e di dos mita den e aña aki. La Niña ta biniendo den efecto, caminda cu e lo bin cun’e cu basta awasero. Precaucion sigur tin cu tuma luga pa mantene rond di cas limpi y tambe papia cu bisti paña riba esaki, pa asina evita cu ta haya e sangura ey rond di cas pa asina e malesa no transmiti su mes. Ta e sangura ta
esun cu ta transmiti e malesanan aki, Tromp a splica.
