Ayera durante un conferencia di prensa di Serlimar, Marelva Wever manager financiero di Serlimar a elabora riba e gastonan di Ser’i Teishi cu tin na banda hunto cu Parkietenbos.
El a precisa cu esaki tin un alcance hopi halto pa e compania desde januari 2018, cu Serlimar a haya e tarea di tuma e bales y pa cuminsa baha e desperdicio cu ta drenta na Parkietenbos, pa esaki bay Ser’i Teishi.
Na juni 2018 e compania a cuminsa entrega e desperdicio pa EcoGas, pa esaki por bay na Ser’i Teishi. Esaki a bin cu un gasto halto, pa e area di Ser’i Teishi total na 2019 ta casi 3.6 miyon florin so, sin e tipping fee cu Serlimar ta paga pa EcoGas, cu ta aproximadamente 5.1 miyon florin.
Wever a declara cu esaki ta gastonan extra cu Serlimar tin pa e cambio aki, pa e remediacion pa stop di manda desperdicio na Parkietenbos y bay pa EcoGas.
Pa via di esaki, el a remarca cu pa e compania tabata hopi importante e desafio di adaptacion di e ley pa nan por yuda cobra pa e parti comercial y tambe residencial y turismo, pa nan por cubri e gastonan en cuestion.
