Ayera atardi durante un conferencia di prensa na Unoca Bon Dia Aruba a haya chens pa entrevista e 4 artistanan Arubano cu a bay hunto na Maracaibo pa expone den un exhibicion titula Mare Nostrum. E exposicion cu e 4 artistanan: Glenda Heyliger, Elvis Lopez, Osaira Muyale y Ryan Oduber a presenta a tuma luga na Museo de Arte Contemporaneo del Zulia (Maczul).

Idea pa exposicion

E exposicion Mare Nostrum a tuma 10 luna pa organisa, segun sra. Muyale, kende tambe tabata un di e artistanan cu a traha obranan pa e exposicion, unda a enfoca riba e relacionnan entre paisnan Venezuela, Aruba y Hulanda. Conhuntamente entre sra. Muyale, e curador independiente di arte y maestro na Universidad di Zulia Jimmy Yanez y directora di Maczul Lourdes Penjaranda e exposicion a wordo organisa pa combersa tocante relacionnan historico y actual entre e 3 paisnan aki..

Sra. Muyale a splica cu e interes pa e proyecto Mare Nostrum a cuminsa durante un research cu su persona tabata haciendo na biblioteca nacional di Coro pa busca informacion riba identidad, espacio y memoria. E curiosidad aki a surgi pasobra sra. Muyale su antepasadonan mediteranio a emigra desde Lebanon pa Coro y despues pa Corsou y Aruba den un trayectoria cu ta bay bek te aña 1898, e ta conta nos.

“M’a encontra hopi informacion pa curiosidad riba e relacion entre Hulanda, Venezuela y Caribe desde siglo 16 y 17.” E meta principal tabata y ta pa por a logra un lenguahe visual interesante mirando e storianan di relacion estrecho cu tin entre e paisnan Hulanda, Venezuela, Aruba y Antias. Tambe pa trece e storianan aki den e forma visual, cu un otro angulo y perspectiva.

Situacion na Venezuela y reforsa lasonan

Sr. Lopez a expresa su sorpresa ora el a mira e museo Maczul pa prome biaha despues di a expone na e mesun museo aki 14 aña pasa. “Ora nos a yega mi a mira cu den tanto tempo e gobiernonan di tanto Chavez como Maduro a laga tur e museonan bay perdi”. Esaki tabata un bon oportunidad pa e 4 artistanan contemporaneo por aporta na e museo pa nan haya mas artistanan internacional y alabes reforsa un relacion estrecho cu ta existi entre Aruba y Venezuela, specialmente den e area di Maracaibo den estado Zulia.

E artista, kende ta alabes director di e academia di arte contemporaneo na Aruba Ateliers ‘89, a subraya cu e relacion entre paisnan hopi biaha ta cay atras pa via di gobiernonan cu a sinta y no a mantene contacto of relacion cu otro pais di un manera of otro. Sinembargo e trabou cu a wordo haci pa e artistanan ta un aporte den nan manera pa establece un contacto bek. E experiencia aki segun sr. Lopez tabata uno sumamente positivo tanto pa nan como artistanan contemporaneo Arubano como pa e artistanan contemporaneo, museo y publico en general na Maracaibo.

Imagen di Venezolanonan

Sr. Oduber di su banda a trece e punto dilanti cu pa via di e situacion actual na Venezuela hopi hende den nos comunidad pero tambe internacionalmente, pa via di prensa, tin un imagen negativo di Venezolanonan. Hopi biaha den prensa, segun sr. Oduber ta wordo enfoca riba aspectonan negativo di economia na Venezuela of e crisis humanitario cu actualmente ta pasando den e pais. Sinembargo e mes cu a bay Maracaibo y prepara un exposicion a haya cu aunke nan tin’e duro, e hendenan Venezolano ta haci lo maximo cu e tiki cu nan tin.

Di e manera aki e artistanan ta fungi di cierto manera un tipo di embahador cultural pa asina personanan di tur e paisnan cu e obra ta trata por dialoga via e lenguahe di arte contemporaneo riba relacionnan socio-cultural y historico entre e paisnan.

“Akinan por ehempel pa hopi aña tin un lucha pa bin cu un museo di arte contemporaneo y nos cu tin mas rikesa den aspecto economico compara cu e region Caribense y tambe Venezuela no por logra esaki. Mientras na Venezuela e museo aki Maczul ta uno gigantesco, y segun mi esun mas grandi na Venezuela. E museo aki bo por compara cu museonan na Miami”.

Sinembargo sr. Lopez a desmenti durante e combersacion cu ta trata aki di algun bishita relaciona cu politica. E rol di e artista den e situacion aki ta pa crea un dialogo y critica unda ta necesario.

“Nos tin di gradici tambe cu nos no a wordo manda politicamente of pa via di gobierno. Pasobra nos a haya sa di invitacionnan di parti di institutonan cultural internacional pa bay representa Aruba den exterior cu a wordo ignora pa gobierno y institutonan cultural. Esaki ta penoso pa e artista pasobra e unico manera pa e artista mustra su obra ta pa bay den exterior.”

Arte contemporaneo

“Como artista visual nos ta constantemente construyendo colectivamente un porta pa unda e bishitante por explora, nos ta constantemente construyendo portanan entre capanan di realidad, creando espacio pa soñonan y experencianan cu no tin plataforma normalmente.”

Arte contemporaneo ta diferencia su mes den e manera con e obra ta wordo presenta. E contexto cu e obra tin por ta por ehempel un critica social di problemanan cu ta andando den sociedad actualmente.

Segun sra. Muyale, ‘nos ta traha hunto pa por comprende e esfuersonan humano. E forsanan di violencia y di politica cu ta afecta cada cas y cada mente riba mundo.’

E artistanan ta purba transforma e traumanan y ta purba uza nan pa pensa y sobrevivi un sistema disfuncional cu mundo ta biba aden, sra. Muyale a conclui.

E trabounan colectivo ta presente den e Museo Maczul desde 28 October 2017 te cu 28 februari 2018. E artistanan ta invita tur hende pa bay libremente bishita e exposicion na Maracaibo.

Nan ta bisa un danki grandi na Ray-Ann Hernandez directora di Unoca cu a atende e proyecto aki cu hopi amor, e artistanan a expresa. Nan ta duna un danki grandi tambe na Mondriaan Fonds di Hulanda y Museo Maczul na Venezuela. Pronto lo tin un lectura riba e exposicion aki na Unoca.

Riba e obranan mes cu e 4 artistanan a traha pa e exposicion nos lo elabora den nos proximo edicion. Tambe nos lo elabora riba e posibel futuro cu e exposicion lo por tin den otro paisnan internacionalmente, tanto como un esfuerso pa trece Mare Nostrum na nos isla mes.