Desde cu minister Glenbert Croes a asumi e encargo di Asunto Social y Labor, el a bin ta traha intensivamente hunto cu tur partner social pa por efectivamente ehecuta e cambionan cu lo trece solucionnan pa cu e crisis nacional social cu Aruba ta bibando. E aspecto social di nos pais pa e ultimo gobiernonan no tabata importante. Es mas, ta masha hopi ta esunnan cu semper a considera e ministerio aki un pretpakket. Dia 24 di november ultimo, gobierno di AVP su negligencia a explota den nos cara cu morto di Rishandroh y despues di su ruman Eugene.
“Mi lo keda menciona nomber di e dos angelitonan aki pasobra ta prohibi lubida e tortura cu e dos muchanan aki a biba. Nan a muri pa trece na luz di dia e decadencia social cu nos pais ta pasando aden”, minister Croes a expresa. Pero e crisis social no ta solamente negligencia of abuso di mucha. E crisis social di Aruba ta core for di 0 te cu 99 aña. Nos crisis social ta core for di esunnan di menos recurso te na nos grandinan y na esunnan fisicamente y mentalmente incapacita. E crisis social ta enorme. E crisis social ta nacional. Y su solucion ta den tur nos man.
Cu esaki den mente, orientando su mes riba tur tereno minister Croes a bishita Ambiente Feliz cu tin e bunita y dificil tarea di habita nos hendenan special. Bunita pasobra hende special ta ser humanonan semper sonriente. Na mes momento dificil, pasobra Aruba ta conta cu hopi hende special mientras cu no tin luga na Aruba pa ubica nan. Tristo y lamentabel con profundo e negligencia di ultimo gobierno a yega. “Mare mi por a soluciona nos problema social acumula di e ultimo decada, inmediatamente. Mare mi por a soluciona nos problema social mi so. E problema aki ta di pais Aruba y ta hunto so nos por yega na solucionnan berdadero, realistico y sostenibel. Esey ta e meta cu ta motiva mi tur dia”, tabata palabranan di sr. Croes.
Ambiente Feliz
Minister Croes a keda impresiona cu e facilidad, impresiona cu e cuido cu nos hendenan special ta ricibi. E amor y dedicacion di e trahadonan di Ambiente Feliz ta di admira. E atencion aki ta visibel den e cliente su sonrisa. Minister ta consciente cu fisicamente mester bay amplia Ambiente Feliz pa e por sigui brinda su bunita labor na nos hendenan cu tin mester unda pa biba. Di parti di minister tin e compromiso di lo duna su apoyo y sosten na tur instancia cu tin e tarea duro y dificil di brinda un hogar na nos hendenan cu sociedad ta lubida. Pa e sector vulnerabel aki minister Croes tin tur atencion.
