ORANJESTAD – Ayera e ‘manifestacion nacional’ anuncia un luna pasa pa partido AVP a tuma luga. Un grupo di sostenedo, alrededor di 400 persona, di e marcha aki bistiendo flanel cu e leyenda: Ban Salba Aruba, a sali un poco pasa di 4’or atardi for di cas di partido direccion Bestuurskantoor. Nan marcha a habri cu un road piece di un djaca grandi cu e leyenda: “Ta basta di injusticia contra pueblo.”

Parlamentario Robert Candelaria di partido AVP a expresa su satisfaccion, mirando e grupo di hende cu a bay sostene nan manifestacion. El a laga sa cu na final di e manifestacion aki, nan intencion ta pa entrega un manifiesto di 10 punto di ‘mal contento.’ Nan ta expresa e mal contento aki ‘punto pa punto y fuerte.’

Igualmente el a indica cu e manifestacion aki ta cumpli cu loke ta stipula den e vergunning cu polis a duna pa realisa e manifestacion aki te 7’or anochi. “Nos lo para duna algun discurso. Despues nos lo entrega e manifiesto, y nos lo want’e t’ey nan,” asina el a declara na salida di e manifestacion aki.

El a agrega cu mester mira cu esaki ta e prome biaha cu tin un manifestacion contra gobierno. Segun Sr. Candelaria e malcontento cu tin ta grandi, entre otro debi na e persecucion politico y intimidacion cu tin. “Toch e grupo cu tin, tin e curashi di sali manifesta, nos ta hopi contento cu esaki!,” el a bisa na Bon Dia Aruba. Sin bisa cuanto hende nan tabata presupuesta pa join e manifestacion aki, el a laga sa cu e grupo cu a presenta ta ‘hopi bon y nos ta contento.’

Otro miembro y ex-parlamentario di partido AVP, Rene Herdé, tambe a expresa su satisfaccion cu e cantidad di hende cu a atende nan yamado pa participa den e manifestacion aki. El a bisa cu e yamado a yega, pero ‘solamente, manera custumber na Aruba, e ta bay poco poco.’

Segun Herdé e manifestacion di ayera ta e comienso. Herdé ta kere cu e gobierno actual (MEP-POR-RED) cu el a cualifica como ‘terco,’ no ta tuma e señal di e prome manifestacion aki na serio. Si ta asina, nan lo cuminsa caba pa prepara e siguiente marcha. “Nan sa di nan terkedad y arogancia, no ta bay cambia.”

El a laga sa cu e marcha aki ta e comienso y nan lo bay sigui te ora cu pueblo ta haya oportunidad pa eleccion nobo. Segun Herdé e rasonamento ta simpel: “Nan a gaña pa yega na poder!” Segun tur regla di constitucion ora bo ta haci un practica asina, e ta mentira y engaño electoral, el a bisa. Pues el a añadi cu e resultado no ta refleha realmente loke pueblo ta pensa. “Pasobra pueblo a vota pensando cu bo ta bay haci algo, pero bo a gañ’e,” el a declara na e matutino aki. Herdé ta conclui cu pueblo kier eleccion nobo pasobra pueblo a wordo gaña.

Na yegada di e manifestacion na Bestuurskantoor varios prominente di partido, entre nan algun miembro di parlamento, a hiba palabra dirigi na e manifestantenan presente. Despues a sigui entrega di e manifiesto na prome minister Eveln Wever-Croes.