Diamars miles di persona a marcha na varios ciudad di Bolivia pa recorda cu un aña pasa Bolivia a biba un “Dia di Mentira”, ora cu e proceso di referendum a ser rechasa, y asina a kita posibilidad di re-eleccion di Presidente Evo Morales. E concentracion di persona a mustra nan apoyo pa Evo Morales, y asina tambe solicita e presidente pa busca posibilidad pa un di cuatro periodo como presidente, pa eleccion di 2019.
E manifestacion a ser celebra cu un marcha na ciudadnan manera El Alto y La Paz, como tambe mobilisacion na Cochabamba, Oruro y Potosí. Bolivianonan a mustra varios expresion di apoyo durante e dia di ayera na Bolivia. “Nos mester dera e mentira fabrica desde imperio, desde capitalismo, cu ta busca difama un presidente digno, un ruman cu a recupera nos patria for di man di hende yama bendepatria”, Feliciano Vegamonte, un campesino, a manifesta. Vegamonte a bisa dilanti di un grupo di persona na La Paz, cu e ta dirigi e confederacion sindical di trahador campesino di Bolivia, y a bisa tambe cu “e movimento social mester keda dera hende mentiroso cien meter bao di tera, cu ta cacho di neoliberalismo”.
E mobilisacion ta un reparacion pa democracia; siguidornan di Evo Morales ta pensa cu democracia a kedadaña pasobra poblacion engaña a vota contra re-eleccion den e referendum di 21 februari di 2016. Den e referendum, mayoria di Boliviano a rechasa un propuesta oficialista pa modifica e articulo 68 di constitucion, cu proposito di habilita e candidatura di Morales pa eleccion di 2019.
Gobierno ta argumenta cu oposicion a arma un trama di mentira tocante e relacion amoroso cu Morales tabatin cu Gabriela Zapata na 2007. Zapata a ser deteni bao acusacion di delito economico, despues di cu autoridad a haya sa cu e tabata usa oficina di gobierno pa haci negoshi cu hende particular. Cu e argumento aki, gobierno hunto partido di Morales, Movimiento al Socialismo (MAS) a defende cu e actual presidente tin derecho di purba logra su candidatura.
