Marc Mangia no ta un persona desconoci na beachnan di Aruba, ya cu e tin varios aña ta decora nos isla cu su impactante esculturanan di santo. Den un combersacion cu nos reportero, Marc a bisa cu e ta bin Aruba pa pasa bon y diberti, y alabes “haci algo bunita cu tur hende por disfruta.”

Marc ta biba na Colombus, Ohio na Merca, unda e ta traha como carpinte. El a conta cu el a cuminsa hunga riba santo cu su yiunan na Palm Beach como 22 aña pasa, y asina a cuminsa cu su esculturanan. “Cada aña mi tabata haci algo un tiki mas grandi, un tiki miho.” Door di su trabao como carpinte, e ta bisa cu “mi por visualisa edificionan, y e sorto di formanan asina.”

“Dies aña pasa, mi a participa den un competencia amateur y mi a gana. Mi a wordo invita e siguiente aña na e siguiente nivel, y asina mi a conoce berdadero escultornan di santo,” Marc a conta. “Y mi a cuminsa perfecciona mi habilidadnan for di esey.”

Marc ta bisa cu e ta bin Aruba cu vakantie y djis pasa bon y diberti, “hunga riba beach, y haci algo bunita cu tur hende por disfruta.” Usualmente, e ta pasa dies dia trahando riba su escultura, den un periodo di mas o menos tres siman. “E ta dura mi dos dia pa colecta e santo. Mi mester saca e santo realmente fini for di awa. Despues mi mester seft’e y mi ta trece aki riba y pone den tur hunto, y mientras mi ta construi mi escultura, mi ta usa e santo ey,” Marc ta splica. Marc tin un bon conocemento di e diferente tipo di santo blanco cu tin riba beach.

Na momento cu nos reportero a combersa cu Marc e tabata trahando riba un kasteel, cual tabata construi riba un plataforma, y Marc a bisa cu e plataforma ta yena cu santo regular, y riba esaki e ta traha e escultura cu e santo fini cu e mes ta saca for di lama. E santo den e plataforma ta hopi mas grof, “pues e no lo ta bon pa corta, e no lo keda pega na otro mucho bon.”

“E santo for di lama ta e miho cu mi a yega di usa na cualkier otro beach. Y e motibo pa esey ta cu e biento semper ta bula den direccion di lama, y ta supla e stof hopi fini eyden riba dianan cu tin hopi biento, pues ta p’esey cu e ta hopi miho.”

Su esculturanan ta bin fascinando tanto nos turista como nos localnan, ya cu nan ta obranan grandi cu hopi detaye cu ta destaca den e paisahe di beach. Cada biaha cu e ta trahando por nota cu hende ta rond di dje ta observa con e ta crea su obranan. Sinembargo, esculturanan di santo ta naturalmente efimero y ta keda destrui den poco tempo.

“Nan por dura hasta seis siman, mi tabatin un cu a dura seis siman despues cu mi a bay,” Marc a bisa. “Ora mi caba cu un seccion y mi no ta bay corta mas, mi ta spray e cu [un mescla di lijm cu awa] y esaki ta pone un casca chikito riba dje pa asina mantene e humedad den e santo un tiki mas largo cu loke normalmente e lo dura.”

Marc a mustra un coleccion di potret di tur e esculturanan cu el a yega di haci durante añanan, demostrando su dedicacion y creatividad pa e modo di expresion aki den naturalesa. “Si tin hende kier wak e den persona, e ta memey di e Ocean Club Beach, y tambe si kier mira e obranan, mi tin un pagina di Instagram, ArubaSandman, unda por mira algun di e esculturanan cu mi a traha durante añanan.”