Tenedor di record mundial, e Kenyano Eliud Kipchoge tabata e atraccion grandi na Marathon di Londres, cu a conoce un version 2020 a pesar di tur problema relaciona cu Covid-19. Sin embargo, e sorpresa a binfaltando aproximadamente 15 minuut, ora Kipchoge no por a sigui e paso di Shura Kitata (Etiopia) y algun otro, y a cay atras.
Yegando meta, Kitata a derota den un vibrante sprint Vincent Kipchumba (Kenya) y Sisay Lemma (Etiopia). Finalmente Kichoge a drenta como number ocho. Kitata su tempo tabata 2 ora, cinco minuut y 41 seconde, bastante aleha di e record di Kipchoge di 2:01.39, producto di un careda bastante lento y cauteloso na inicio.
Kipchoge, cu a perde un marathon na 2013, a bisa cu e tabata desapunta pero cu e no sa kico a pasa. “E ultimo 15 km mi tabata sinti mi orea banda drechi tapa. Mi tabatin kramp den mi heup y pia. El a djis sucede den e careda. Mi a start bon. Ta bastante friu pero mi no kier duna e condicion di tempo e culpa.
Loke mester a bira un victoria facil pa Kipchoge, sigur ora Kenenisa Bekele a cancela su participacion pa motibo di un lesion, a tuma otro rumbo. Kipchoge nunca por a aleha di e grupo lider di ocho atleta, y despues no tabatin contesta pa e aceleracion di Kitata.
Den categoria femenino, Brigid Kosgei, tenedor di record mundia, a defende su titulo. Mescos cu e careda di categoria masculino, e competencia a tuma lugar den condicion di awacero constante, riba un circuito specialmente diseña pa via di e restriccionnan di coronavirus.
Den careda di rolstoel, David Weir no a logra un di nuebe victoria na Londres, cu Brent Lakatos di Canada strobando e fiesta Britanico. Den categoria femenino Manuela Shar tambe a haya sorpresa na man di Nikita den Boer cu a bay cu e victoria.
