Un team di experto di fundacion CARMABI y Universidad di Wageningen recientemente a finalisa e mapa ecologico di panorama di vegetacion di Aruba. Cu meta pa reforsa esfuersonan di conservacion, e investigacion aki ta ofrece un bista detaya riba con e panorama natural di Aruba a evoluciona durante ultimo 50 aña, y ki stapnan ta necesario pa preserva su biodiversidad.

Esaki a keda revela den un publicacion di DCNA riba nan website.

Estudio

E estudio ta ofrece un examinacion comprensivo di e vegetacion di Aruba, basa riba mas cu 300 parcela di muestra colecta entre añanan 1996 y 2000. E mapa nobo aki ta un herment esencial pa conservacion di biodiversidad den futuro, resaltando degradacion significante den vegetacion di e isla pa motibo di urbanisacion, turismo, especienan invasivo y cambio climatico.

E hallazgonan aki ta actualisa e mapa seminal di 1956 crea pa Stoffers, incorporando metodonan moderno, pa provee datonan cuantitativo pa prome biaha, cu ta bay permiti miho planeamento pa uso di tereno y maneho ecologico bayendo dilanti.

Hallazgo

E investigacion a revela hallazgonan alarmante: perdida significante di vegetacion y degradacion pa motibo di actividad humano, particularmente urbanisacion y turismo, cu e banda occidental di e isla esun mas afecta. E hallazgonan a resalta un perdida preocupante di tiponan critico di vegetacion, incluyendo e casi-desaparicion di e “Evergreen woodland” y e “Herbaceous strand community.” E areanan aki, antes vital pa biodiversidad di Aruba, a keda impacta severamente pa actividad humano y especienan invasivo, cu deterioro significante den especienan manera e thorny woodland cu antes a deriva di e evergreen woodland. Ademas, e problema continuo di baca, cabrito y otro animal cu ta core rond, erosion, y intrusion di awa salo empeora pa cambio climatico, ta menasa mas ainda e resiliencia ecologico di Aruba.

Recomendacion clave

E estudio ta haci seis recomendacion clave pa Aruba atende cu e problema alarmante aki. Pa di prome, e eliminacion inmediato di animalnan di cria cu ta move libremente den areanan natural. Di dos, e propagamento y plantamento back di especienan nativo inusual. Di tres, control estricto di especienan invasivo di mata a traves di un plan di accion. Di cuatro, desaroyo di ‘green corridor’ pa conecta areanan di vegetacion isola. Di cinco, pa protege elementonan di tereno sobreviviente den areanan urbano y industrial. Y finalmente, e implementacion di medidanan practico infrastructural pa yuda infiltracion di awa di yobida den grondwater.

Contexto regional
 Pa Caribe Hulandes den sentido mas amplio, e estudio aki ta un punto di referencia crucial. E vegetacion unico di Aruba ta un componente clave di e bioma seco di Caribe, cu ta extende na islanan bisiña manera Bonaire y Corsou. E salud di e ecosistemanan aki ta critico pa biodiversidad regional, ya cu nan ta sostene especienan unico na e islanan ABC.

E caso di Aruba ta resalta e necesidad urgente pa implementacion di strategianan di conservacion na e region, manera eliminacion di bestianan di cria cu no ta nativo, e propagamento di especienan den peliger, y e creacion di gangnan ecologico pa promove conectividad di habitat.

E estudio aki a keda comisiona pa DCNA y ta bay alimenta e programa cu ta bay lansa pronto, Conservacion y Restauracion di Habitat Clave. E programa nobo aki ta bay traha pa trece hunto estudionan manera esaki, pa implementa esfuersonan di conservacion y restauracion cu impacto na e seis isla di Caribe Hulandes. E medidanan aki ta bay ta esencial pa construi resiliencia contra cambio di clima y sigura e sobrevivencia a largo plaso di e biodiversidad di e region.

E Aliansa di Naturalesa di Caribe Hulandes (DCNA pa su siglanan na Ingles0, ta sostene comunicacion (cientifico) y outreach den region di Caribe Hulandes door di haci informacion cientifico relaciona cu naturalesa disponible mas ampliamente a traves di entre otro e Base di Dato di Biodiversidad di Caribe Hulandes, e plataforma di noticia di DCNA BioNews, y a traves di prensa. E articulo aki ta contene e resultado di varios proyecto cientifico, pero e proyectonan mes no ta proyecto di DCNA.