Mantene ambtenaar ‘spirito’… Tin nomber: ‘Corupcion’…

Nos a keda realmente sorprendi cu e comentarionan di varios banda tocante e caso di un periodista cu a yega na un acuerdo cu Ministerio Publico pa un asina yama ‘schikking’ pa su culpabilidad den cuadro di e caso penal ‘Flamingo’, cu e pago back di e salario cu el a obtene sin traha como empleado publico.

Pa tur claridad den e caso aki: e sospechoso cu a acepta culpabilidad a cuminza traha, o mejor dicho a cuminza cobra na april 2019, despues di cera contrato cu e ministro encarga cu entre otro Infrastructura, cu ainda ta sperando huicio den e caso Flamingo, unda e ta aparece como sospechoso principal. Na fin di januari 2020 e siguiente ministro a keda huramenta y a keda na e puesto pa un periodo cortico, hayando su retiro na october di e mesun aña. Durante su estadia e ta e persona cu a cuminza atende e asunto di e ‘ambtenaarnan spirito’, esnan cu tabatin contrato pero no tabata mester presenta na trabao. Despues di retiro di e ministro, e periodista a keda ainda cinco luna riba payroll sin traha, mientras e ministerio a pasa pa nos actual Promer Ministro, cu tambe den e actual gabinete tin e cartera ey. Kico esaki ta significa? Cu el a admiti di no a traha durante un periodo di cinco luna mientras e persona responsable tabata nos promer mandatario. Pakico nos ta conclui esaki? Pasobra esey ta e periodo cu Ministerio Publico ta menciona como e periodo den cual el a comete e delito di ricibi pago sin traha… Y pakico esaki ta importante? Pasobra e asunto aki no a caba aki, no pa nos como medio. Nos por a tuma nota di declaracion di e ex-ministro cu a inicia e acuerdo cu e periodista, cu ta liga politicamente na e partido grandi den e actual coalicion, unda e ta tira e culpa riba su sucesora, cu ta netamente e persona cu a cuminza e denuncia contra e ‘ambtenaarnan spirito’. Ta hustamente su intencion pa actua contra e tipo di cancer den gobernacion aki a conduci na su retiro na man di e coalicion di cual e tabata forma parti. Pero obviamente no tabatin medida contra e ambtenaar spirito aki, probablemente otronan tampoco.

Riba pregunta di prensa e siman aki, tocante e asunto di e periodista aki, nos Promer Ministro a declara cu el a hereda e situacion y cu tur e hendenan cu el a keda cu nan, si a traha. El a declara tambe cu e periodista aki a traha pa su persona, hasta mencionando e trabao cu el a haci den un comision. E pregunta cu ta surgi ta naturalmente, si e periodista aki a traha pa Promer Ministro, despues di e periodo di inactividad paga cu placa publico, el a haya un contrato nobo anto? Asina ta premia hende cerca di partido, despues cu nan comete delito? Por ta cu awor nos Promer Ministro en berdad tin un mihor control riba su empleadonan, manera el a bisa. Nos no ta bay disputa esey; simplemente pasobra nos no tin informacion, ni confirmando ni desmintiendo, pues nos ta tuma su palabra den esey. Sin embargo, den e caso di e periodista aki si el a logra haya pago pa cinco luna bao di su responsabilidad; esey ta un hecho. Y esaki riba su mes ta suficientemente grave. Pakico? Pasobra a organiza henter un persecucion di e anterior ministro aki, desmintiendo loke el a denuncia, mientras loke e tabata bisa, tabata berdad. Conclusion, di nos anto, ta cu e tempo ey a considera proteccion di hende cerca di partido, cu tabata cobra sin traha, mas importante cu actua corectamente y coregi e cosnan robez cu nan colega ministro a denuncia. Esaki ta tira un luz completamente diferente riba e conflicto entre mandatario cu a tuma lugar na 2020.

Pero esey no ta tur. Ta importante pa analiza e fenomeno mes di periodista paga, di diferente forma, cu placa di pueblo pa faborece opinion publico encuanto maneho di gobierno. Manera e ex-ministro a declara, esaki tabata sucede bao di tur gobierno cu Aruba a conoce. Nos por kere esey, pero esey no ta haci e acto ey corecto, pasobra ‘tur a hacie’. Sin embargo, laga nos defini bon cla kico ta e limite cu cualkier mandatario mester mantene na vista ora ta trata di influencia opinion publico. Por ehemplo, si un gobierno ta contrata un periodista pa traha, como unico trabao, pa percura pa informacion di gobierno keda divulga di bon manera, nos no ta opone esey, basta e ta sucede publicamente. Pero ora ta trata di contrato secreto cu hende cu ta traha den prensa, pa nan no mester traha pa nan placa pero simplemente mester duna gobierno un bon imagen den opinion publico, esey ta un abuso, e ta corupcion, e ta mal uso di fondo publico. Den e caso concreto na cual ta referi aki, no ta e ambtenaar spirito so ta culpable, sino tambe esun cu a cera e contrato cune y a palabra cu e no mester traha como empleado publico, pero ta haya pago pa percura cu e mandatario por haya un imagen faborable. Nos por supone cu e caso aki lo ta parti di e caso Flamingo cu a cuminza su ruta den corte, di parti di e otro persona envolvi.

Un vez mas, si un gobierno kier contrata periodista pa mehora nan comunicacion publico, esey por. Traha contrato secreto cu periodista, sin traha, esey yama corupcion… A proposito, esey no ta sucediendo awor, ‘as we speak’…