E prome fase di e proyecto di agroforesteria sintropico na scolnan basico a yega su fin pa e aña escolar 2023-2024 y un total di 11 scol basico a ricibi nan hardin di alimentacion. E proyecto ta continua den e siguiente aña escolar y ya caba inscripcion a habri. E biaha aki e proyecto a amplia y ta habri pa otro organisacion.
Despues di e prome fase di e proyecto agroforesteria sintropico, aworaki ta preparando pa e siguiente fase. Pa e siguiente fase aki, inscripcion a habri no solamente pa scolnan basico, pero awor tur instancia social, scol secundario, centro di bario y comunidad di bisindario por participa.
E scolnan cu a participa durante e prome fase di e proyecto a haya nan hardin di alimentacion y asina por cosecha nan propio fruta y berduranan. Living Soil Aruba, hunto cu Santa Rosa Aruba tabata encarga cu e guia inicial pa e plantacion di e hardinnan di alimentacion, pero mantencion tabata den man di e scolnan.
Recientemente Living Soil Aruba a publica ariba nan pagina di Facebook cu despues di haci un bishita na scolnan cu a ricibi nan hardin di alimentacion, por a tuma nota cu e mantencion di e hardinnan no tabata manera debe ser.
“Durante mi bishita na e scolnan primario cu tin hardin di alimentacion a siman pasa, mi a nota cu mantencion no semper ta riba standard. Mientras cu mi ta compronde cu maestronan ta dedica na nan profesion primario, ta importante pa recorda cu scolnan a compromete na mantene e hardin di alimentacion, dependiendo riba apoyo di comunidad,” Living Soil a indica.
Nan a splica cu mantencion di un hardin di alimentacion ta rekeri di un enfoke holistico cu ta inclui varios practica clave. E diferente practica aki ta importante pa por mantene e hardin di alimentacion lo mas optimal posibel pa e fruta y berduranan por crece efectivamente.
Pa e motibo aki nan a anuncia cu pa e aña escolar nobo cada skol lo tin un specialista conecta cune, cu lo train por lo menos un miembro di e staf den e enfoke holistico di Agroforesteria Sintropico. “E iniciativa aki lo sigura cu nos hardinnan di alimentacion ta prospera y sigui ta un recurso educativo di balor,” nan a remarca.
Living Soil Aruba a habri inscripcion pa personanan cu kier siña tocante e enfoke holistico aki y yuda e scolnan mantene nan hardin di alimentacion.
Potret: pagina di Facebook Living Soil Aruba
