Manifestantenan uni exigiendo apertura inmediato di frontera

Manifestacion diasabra mainta na Bellevue a exigi prefete deleguee, Sylvie Feucher pa habri e frontera back inmediatamente, y bolbe na negociacion cu gobierno di banda Hulandes pa un maneho colaborativo pa maneha e crisis.

Nan a exigi refuerso di medidanan di salud riba henter e teritorio pa combati e aumento di caso di coronavirus. Asistencia tabata bou expectativa, algun 60 persona di ambos banda di e isla, indicativo talbes di un poblacion cauteloso di protesta sucesivo contra inhusticia na banda Frances. Pero manera organisador Lenny Mussington frecuentemente ta señala na e demostracionnan aki, ‘no ta cantidad ta importante, sino calidad’.

E keho principal di e organisador tabata contra e hecho cu e Prefete ‘ta tuma e decision unilateral di cera nos frontera simbolico, desafiando e Tratado di Concordia cu a garantisa pa 372 aña di movemento liber di hende riba e teritorio.

“Ee todo autocratico aki di maneha e crisis a proba di ta desastroso pa nos pais y bienestar di su hende. E prefete a deliberadamente ignora e hecho cu ambos banda ta comparti un destino comun. Consecuentemente, e situacion economico a empeora. E pretexto falso cu e ta usando, cu ta pa protege e poblacion, ta totalmente infunda”, segun e declaracion.

Ni Feucher ni e presidente di e Collectivite, Daniel Gibbs tabata presente na e protesta pa ofrece solucion. Despues di un reunion dilanti Home N Tools, e manifestantenan a marcha bou Bandera di Unidad den direccion di e checkpoint di Gendarme, mita caminda na frontera di Cole Bay, unda un cantidad di persona a papia.

Entre e oradornan tabata organisador Lenny Mussington; Lider di Oposicion di Conseho Teritorial, Louis Mussington; Rhoda Arrindell y lider di sindicato WINFOL, Theophilus Thompson, kende a yega di e banda Hulandes; Shujah Reiph, Victor Paines, Herve Meunier, Isabelle Artsen di e conseho tres, y ex-presidente di conseho teritorial, Alain Richardson.

Louis Mussington a bisa cu e tabata kier pa autoridadnan compronde cu permitiendo hende pa crusa e frontera cu un autorisacion pero sin test di e virus ta inutil y ineficiente. E biaha aki, e prefecture a ricibi mil peticion pa autorisacion.

“Ta demostra cientificamente cu bistiendo mondkapje, labando man y distanciando social ta e unico arma cu nos tin pa combati e malesa aki te cu por haya un vacuna”, el a bisa. “Nos mester stop fiesta, cera club nocturno  cera barnan trempan. Ban enfoca bek riba e medidanan preventivo aki pero no mata economia. Nos a manca economia caba. Nos ta bisando laga hende circula libremente pero na mes momento reenforsa medidanan di siguridad.”

Lenny Mussington tabata kier pa e prefete sa cu e protesta ta tocante e unidad di e isla y e Tratado di Concordia. “Ta den DNA di pueblo di St. Martin pa biba como uno”, el a bisa.

Rhoda Arrindell a comenta: “Sea bo ta kere den unidad of no. Si bo ta kere den unidad bo tin un obligacion di  para contra tur e formanan aki di division di nos isla. Nos mester lucha pa preserva unidad na cualkier costo.” El a referi na e narrativa di e virus como un excuus pa cera e frontera como ‘sin sentido’.

Tabatin testimonio poderoso di doño di negoshi y representante di districto tres, Isabelle Artsen, kende a describi e confrontacion di 30 minuut cu Gendarmes tocante documentonan un siman atras. E tabata purbando di bolbe na e banda Frances unda e ta biba despues di bishita e banda Hulandes. A pesar di mustra su ID y prueba di residencia, toch a rechas’e pasobra e no tabatin un autorisacion. Finalmente a lag’e drenta, despues di bira, den su propio palabranan, ‘loco’.

“Con un persona mester sinti na momento cu ta bisa nan cu nan no por bay cas na unda nan a nace y ta biba? Esaki ta afectando nos tur mentalmente. Mester hacie di un forma diferente sin acoso y provocacion, sino cu respet. Mi tabata bou stress desde Irma, luchando pa sobrevivi. No ta e virus cu ta bay mata nos, sino e stress.”

Alain Richardson a considera e ceramento di frontera ilegal y inconstitucional. “Bo ta kere cu e control aki y den French Quarter ta bay stop e virus? Obviamente no. Mester ta un esfuerso coordina di ambos gobierno pa preventi transmision. Hopi negoshi ta den peliger. Mi sa di un den French Quarter cu ta bay cera pasobra ta depende 90% riba clientela di banda Hulandes. E negoshi chikito di mi propio yiu muhe ya ta perdiendo 50 porciento di su clientenan di Dutch Quarter.”