(AP) – Manifestantenan pro Palestino a habri paso na Parlamento Australiano pa desplega borchinan na e fachada, y un senador a bandona partido di gobierno pa su posicion tocante e guera na Gaza.

E tensionnan pa loke ta trata e guera di Israel contra Hamas a domina e ultimo sesion parlamentario prome cu un pauze di cinco siman.

E cuatro manifestante a ser deteni despues di a coloca borchinan cu palabranan “crimen di guera” y “genocidio”, asina como e lema Palestino “for di riu te lama, Palestina ta bay ta liber,” e cual a permanece colga durante mas cu un ora riba e fachada di e edificio, conoci como “Gran Veranda.”

Paden di edificio, senador naci na Afganistan, Fatima Payman, e unico legislado federal Australiano cu a hiba su hiyab den sesionnan, a anuncia cu a bandona e Partido Laborista, cu ta den gobierno, debi cu el a nenga di asumi un posicion di e partido tocante Gaza.

“Mi famia no a huy for di un pais destrui pa e guera pa bin akinan como refugiado pa mi bin warda silencio ora mi ta wak actonan monstruoso cometi contra personanan inocente,” Payman a bisa na periodistanan.

“Presencia e indiferencia di nos gobierno pa e inhusticia mayor di nos tempo ta pone mi duda di e caminda cu e partido ta tumando,” el a agrega.

E senador, cu ta den su prome legislatura, siman pasa a desafia su compañeronan di partido ora a apoya e mocion di un partido chikito cu tabata reclama na Senado “pa reconoce estado di Palestina.”

Australia no ta reconoce un estado Palestino. Gobierno ta apoya un decision di dos estado den cual Israel y su futuro estado Palestino lo por coexisti den paz y seguridad den fronteranan cu reconocemento internacional.

Payman ta bay permanece den Senado como legislador independiente. Ta e prome legislado di gobierno cu ta bandona e partido for di momento cu gobierno di prome minister, Anthony Albanese a ser eligi na 2022.

Polis a bisa cu ta spera cu e cuatro manifestante lo enfrenta acusacionnan pa drenta di e forma ey.

E cuatro manifestante a provoca un operacion di seguridad na Parlamento e cual a impedi pa hopi hende drenta den edificio. Galerianan publico tanto na Camara di Representante como na Senado a permanece cera pa precaucion.

Di su parti, Albanese a condena e protesta y a bisa cu “protesta pacifico tin un espacio importante den nos sociedad, pero esaki no tabata un protesta pacifico.”

E lider opositor Peter Dutton a exigi pa haya sa ken a permiti entrada di e manifestantenan na edificio y a describi su mensahe como antisemita.